الماتى اكىمى باقىتجان ساعىنتاەۆ، ونىڭ ورىنباسارلارى، اۋدان اكىمدەرى، قوعام قايراتكەرلەرى، جەلتوقسان جانە جاستار ۇيىمدارىنىڭ وكىلدەرى 1986 جىلعى جەلتوقسان وقيعالارىنىڭ قۇرباندارىن ەسكە الدى، دەپ حابارلايدى “ادىرنا” ۇلتتىق پورتالى Zakon.kz سايتىنا سىلتەمە جاساپ.
الماتى قالاسى اكىمدىگى ءباسپاسوز قىزمەتىنىڭ حابارلاۋىنشا، ەسكەرتكىشكە گۇل قويۋ راسىمىنەن كەيىن جينالعاندار سول وقيعالاردا قازا بولعانداردى ءبىر مينۋت ۇنسىزدىكپەن ەسكە الدى. ءدىن وكىلدەرى ەسكە الۋ ءۇشىن قۇران وقىدى. وسىدان سوڭ جەلتوقسانشىلارعا ارنايى اس ۇيىمداستىرىلدى.
«تاۋەلسىزدىك تاڭى» مونۋمەنتى 2006 جىلى تۇڭعىش پرەزيدەنت – ەلباسى ن. نازارباەۆتىڭ قاتىسۋىمەن جەلتوقسان-ساتباەۆ كوشەلەرىنىڭ قيلىسىندا اشىلعانىن، جاستار ارمانداعان تاۋەلسىز قازاقستاندا ءومىر ءسۇرىپ جاتقانىمىز ەرەكشە اتالىپ ءوتىپ ەدى.
مەملەكەت باسشىسى ق. توقاەۆتىڭ جەلتوقسانشىلاردىڭ ەرلىگىن ماڭگى ەستە قالدىرۋ تۋرالى تاپسىرماسىنا سايكەس الماتىدا سول وقيعالاردىڭ قۇرمەتىنە «جەلتوقسان» دەپ اتالاتىن ساياباق اشىلدى. سونىمەن قاتار، وسى ساياباقتا ورناتىلاتىن ەسكەرتكىشتى دايىنداۋعا شىعارماشىلىق بايقاۋ جاريالاندى.
ايتا كەتسەك، 1986 جىلعى 17-18 جەلتوقساندا الماتىدا كوكپ وك باس حاتشىسى ميحايل گورباچەۆتىڭ قازاقستان كومپارتياسىنىڭ ءبىرىنشى حاتشىسى دىنمۇحامەد قوناەۆتى قىزمەتىنەن بوساتۋى جانە ونىڭ ورنىنا قازاقستاندا بۇرىن-سوڭدى جۇمىس ىستەمەگەن ۋليانوۆ وبكومىنىڭ ءبىرىنشى حاتشىسى گەننادي كولبيندى اكەلۋى تۋرالى شەشىمىنە بايلانىستى تولقۋلار باستالدى. جينالعاندار ەل باسشىسى لاۋازىمىنا بايىرعى حالىقتىڭ وكىلىن تاعايىنداۋدى تالاپ ەتتى. ميتينگ جاپپاي تارتىپسىزدىكتەرگە ۇلاستى.
“ادىرنا” ۇلتتىق پورتالى
