اقمولا وبلىسىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي مەملەكەتتىك ءتىلدى كەڭىنەن ناسيحاتتاپ جۇرگەن تاۋەلسىزدىك قۇرداستارى اراسىندا «تاۋەلسىزدىك بارىسى» اتتى وبلىستىق ونلاين بايقاۋى ءوتتى، دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.
ۆەدومستۆونىڭ مالىمەتىنشە، شاراعا وبلىستىڭ اۋداندارى مەن قالالارىنان 1991 جىلى تۋعان جاستار، ياعني 30 جاستاعى 13 ۇمىتكەر قاتىستى. بايقاۋ مەملەكەتتىك ءتىلدىڭ قولدانۋ اياسىن كەڭەيتۋ، جاستار اراسىندا قازاق ءتىلىن ءبىلۋ دەڭگەيىن كوتەرۋ، ىقىلاسى مەن قىزىعۋشىلىعىن ارتتىرۋ ماقساتىندا وتكىزىلدى. قاتىسۋشىلار وزدەرىن تانىستىرىپ، جەتكەن جەتىستىكتەرى تۋرالى بەينەروليك دايىندادى. سايىستىڭ سوڭعى كەزەڭىندە ولار بولاشاقتاعى ماقسات-جوسپارلارىمەن ءبولىستى.
«ەلىمىز تاۋەلسىزدىك العان جىلى تۋعان ۇل-قىزدار، بۇگىنگى كۇنى ءار سالانىڭ قىر-سىرىن مەڭگەرگەن مامان يەلەرى ەكەنىن ءتۇسىندىم. بۇگىنگى بايقاۋعا قاتىسقان تاۋەلسىزدىك قۇرداستارىنىڭ ىشىندە اقىن دا بار ءانشى دە بار، مۇعالىم دە، اكىم دە، پوليتسيا قىزمەتكەرى دە بار ەكەن. ۇمىتكەرلەردىڭ بارلىعى ونەرلى، ال جەتكەن جەتىستىكتەرىنىڭ ءوزى ءبىر توبە. تاۋەلسىز ەلىمىزدە وسىنداي ءبىلىمدى دە، تالانتتى جاستاردى كورگەندە قۋانىشىمدا شەك بولمايدى»، - دەپ اتاپ ءوتتى قازىلار القاسىنىڭ مۇشەسى اقمولا وبلىسىنىڭ ءبىلىم باسقارماسى جانىنداعى وبلىستىق وقۋ ادىستەمەلىك كابينەتىنىڭ ادىسكەرى جۇلدىز ابىلقايىروۆا.
بايقاۋ قورىتىندىسى بويىنشا ءبىرىنشى ورىنعا كوكشەتاۋ قالاسىنان فاريزا اسىلبەكوۆا لايىقتى دەپ تانىلسا، ەكىنشى ورىندى ەرەيمەنتاۋ اۋدانىنان ەرلان داۋلەتۇلى، ءۇشىنشى ورىندى جاقسى اۋدانىنان قۇرالاي قۇدايبەرگەنوۆا يەلەندى.
سايىس جەڭىمپازدارى مەن قاتىسۋشىلارى ديپلومدار، العىس حاتتار جانە باعالى سىيلىقتارمەن ماراپاتتالدى. ايتا كەتەيىك، وڭىردە ەل تاۋەلسىزدىگىنىڭ 30 جىلدىق مەرەيتويىنا ارنالعان 12000-نان استام شارالار وتكىزىلدى
