اقش كونگرەسىندە قازاقستاندى تاۋەلسىزدىكتىڭ 30 جىلدىعىمەن قۇتتىقتادى. بۇل تۋرالى قازاقپارات ءسىم سىلتەمە جاساپ حابارلايدى. اقش كونگرەسسىندەگى وكىلدەر پالاتاسىنىڭ مۇشەلەرى جاكلين ۆالورسكي، روبەرت ادەرحولت جانە ستيۆەن شابوت قازاقستان تاۋەلسىزدىگىنىڭ جانە ەكىجاقتى قارىم-قاتىناستاردىڭ 30 جىلدىعىنا وراي كونگرەستىڭ رەسمي بيۋللەتەنىندە تىركەلگەن جاريالى مالىمدەمەلەر جاسادى.
ج. ۆالورسكي قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن. نازارباەۆ ساياساتىنىڭ ارقاسىندا قول جەتكىزگەن قازاقستاننىڭ تاماشا جەتىستىكتەرىن، سەمەي پوليگونىن جابۋ جانە يادرولىق ارسەنالدان باس تارتۋ ارقىلى «يادروسىز بولاشاق ءۇشىن مىندەتتەمەلەردى قابىلداۋ» تۋرالى شەشىمدەردىڭ كورەگەندىگىن، «قازاقستاندا ەركىن نارىقتىق ەكونوميكا قۇرۋ يدەياسىنا بەرىلگەندىگىن» جانە شەتەلدىك ينۆەستورلارمەن جۇمىستىڭ جوعارى ماڭىزدىلىعىن تەرەڭ تۇسىنگەنىن جوعارى باعالادى. قازاقستاندا ودان ءارى جاڭعىرتۋ بويىنشا قادامداردىڭ قاجەتتىلىگىن ايتا كەلىپ، ول «پرەزيدەنت قاسىم-جومارت توقاەۆ قازاقستانداعى قوعامدىق ءومىردىڭ بارلىق سالالارىنا باعىتتالعان ىشكى رەفورمالاردى، ونىڭ ىشىندە ازاماتتىق قوعامنىڭ اشىقتىعىن ارتتىرۋعا باعىتتالعان قولدانىستاعى زاڭداردى جاڭارتۋعا باعىتتالعان ساياسي جانە پارلامەنتتىك رەفورمالاردى جۇزەگە اسىرۋعا ۇلكەن كوڭىل بولۋدە» دەپ مالىمدەدى.
«قازاقستان 30 جىلدان بەرى ورتالىق ازياداعى بەيبىت جانە تۇراقتاندىرۋشى كۇش بولىپ قالا بەرۋدە»، بۇل ەلدىڭ دەموكراتيا قۇندىلىقتارىنا بەرىكتىگىنىڭ دالەلى دەپ سانايدى ينديانا شتاتىندا سايلانعان كونگرەسسۆۋمەن. كونگرەسسمەن ر. ادەرحولت قازاقستان حالقىن تاۋەلسىزدىكتىڭ 30 جىلدىعىمەن قۇتتىقتاپ، الەمنىڭ ستراتەگيالىق ماڭىزدى وڭىرىندەگى ەلىمىزدىڭ ايرىقشا رولىنە توقتالدى.
«پرەزيدەنت قاسىم-جومارت توكاەۆتى جانە قازاقستان حالقىن قىسقا مەرزىم ىشىندە قول جەتكىزگەن ەلەۋلى ورلەۋىمەن قۇتتىقتايمىن»، – دەدى ول.
اقش كونگرەسىندەگى الاباما شتاتىنىڭ وكىلى قازاقستاننىڭ اقش-پەن قورعانىس، قاۋىپسىزدىك، تەرروريزمگە قارسى ءىس-قيمىل جانە باسقا دا ءوزارا مۇددەلى سالالارداعى ءوزارا ءىس-قيمىلىن جوعارى باعالادى. وسى ورايدا ەكى ەل اراسىنداعى كەڭەيتىلگەن ستراتەگيالىق سەرىكتەستىكتى جانە ارىپتەستەرىمەن قاتار قازاقستاننىڭ يادرولىق قارۋدى تاراتپاۋ سالاسىنداعى جەتەكشى ءرولىن، 2006 جىلى ورتالىق ازياداعى يادرولىق قارۋدان ازات ايماق تۋرالى شارتتىڭ ماڭىزدىلىعىن اتاپ ءوتتى. اقش كونگرەسىندەگى قازاقستاننىڭ دوستارى توبىنىڭ تەڭ توراعاسى، وگايو شتاتىندا سايلانعان كونگرەسسمەن س. شابوت ەكى ەل اراسىنداعى ەكونوميكالىق بايلانىستى ودان ءارى دامىتۋدىڭ ماڭىزدىلىعىن ايتتى.
ونىڭ ايتۋىنشا، «قازاقستاندا مىقتى نارىقتىق ەكونوميكانى قالىپتاستىرۋعا كۇش سالىپ، شەتەلدىك ينۆەستيتسيالارعا تارتىمدى جاعداي جاساۋ ماقساتىندا زاڭ ۇستەمدىگى ماسەلەلەرىنە كوپ كوڭىل بولىنەدى». وسى ورايدا ول «استانا» حالىقارالىق قارجى ورتالىعىنىڭ رولىنە بولەك توقتالدى. اقش كونگرەسىنىڭ وكىلدەرى قابىلداعان جاريالى مالىمدەمەلەرى ەكىجاقتى كەڭەيتىلگەن ستراتەگيالىق سەرىكتەستىكتىڭ قارقىندى دامۋىنىڭ تاعى ءبىر دالەلى بولىپ تابىلادى.
