AQSh Kongresinde Qazaqstandy táýelsizdiktiń 30 jyldyǵymen quttyqtady. Bul týraly QazAqparat SIM silteme jasap habarlaıdy. AQSh Kongressindegi Ókilder palatasynyń músheleri Jaklın Valorskı, Robert Aderholt jáne Stıven Shabot Qazaqstan táýelsizdiginiń jáne ekijaqty qarym-qatynastardyń 30 jyldyǵyna oraı Kongrestiń resmı bıýlleteninde tirkelgen jarııaly málimdemeler jasady.
J. Valorskı Qazaqstan Respýblıkasynyń Tuńǵysh Prezıdenti – Elbasy N. Nazarbaev saıasatynyń arqasynda qol jetkizgen Qazaqstannyń tamasha jetistikterin, Semeı polıgonyn jabý jáne ıadrolyq arsenaldan bas tartý arqyly «ıadrosyz bolashaq úshin mindettemelerdi qabyldaý» týraly sheshimderdiń kóregendigin, «Qazaqstanda erkin naryqtyq ekonomıka qurý ıdeıasyna berilgendigin» jáne sheteldik ınvestorlarmen jumystyń joǵary mańyzdylyǵyn tereń túsingenin joǵary baǵalady. Qazaqstanda odan ári jańǵyrtý boıynsha qadamdardyń qajettiligin aıta kelip, ol «Prezıdent Qasym-Jomart Toqaev Qazaqstandaǵy qoǵamdyq ómirdiń barlyq salalaryna baǵyttalǵan ishki reformalardy, onyń ishinde azamattyq qoǵamnyń ashyqtyǵyn arttyrýǵa baǵyttalǵan qoldanystaǵy zańdardy jańartýǵa baǵyttalǵan saıası jáne parlamenttik reformalardy júzege asyrýǵa úlken kóńil bólýde» dep málimdedi.
«Qazaqstan 30 jyldan beri Ortalyq Azııadaǵy beıbit jáne turaqtandyrýshy kúsh bolyp qala berýde», bul eldiń demokratııa qundylyqtaryna beriktiginiń dáleli dep sanaıdy Indıana shtatynda saılanǵan kongressvýmen. Kongressmen R. Aderholt Qazaqstan halqyn táýelsizdiktiń 30 jyldyǵymen quttyqtap, álemniń strategııalyq mańyzdy óńirindegi elimizdiń aıryqsha róline toqtaldy.
«Prezıdent Qasym-Jomart Tokaevty jáne Qazaqstan halqyn qysqa merzim ishinde qol jetkizgen eleýli órleýimen quttyqtaımyn», – dedi ol.
AQSh Kongresindegi Alabama shtatynyń ókili Qazaqstannyń AQSh-pen qorǵanys, qaýipsizdik, terrorızmge qarsy is-qımyl jáne basqa da ózara múddeli salalardaǵy ózara is-qımylyn joǵary baǵalady. Osy oraıda eki el arasyndaǵy keńeıtilgen strategııalyq seriktestikti jáne áriptesterimen qatar Qazaqstannyń ıadrolyq qarýdy taratpaý salasyndaǵy jetekshi rólin, 2006 jyly Ortalyq Azııadaǵy ıadrolyq qarýdan azat aımaq týraly sharttyń mańyzdylyǵyn atap ótti. AQSh Kongresindegi Qazaqstannyń dostary tobynyń teń tóraǵasy, Ogaıo shtatynda saılanǵan kongressmen S. Shabot eki el arasyndaǵy ekonomıkalyq baılanysty odan ári damytýdyń mańyzdylyǵyn aıtty.
Onyń aıtýynsha, «Qazaqstanda myqty naryqtyq ekonomıkany qalyptastyrýǵa kúsh salyp, sheteldik ınvestıııalarǵa tartymdy jaǵdaı jasaý maqsatynda zań ústemdigi máselelerine kóp kóńil bólinedi». Osy oraıda ol «Astana» Halyqaralyq qarjy ortalyǵynyń róline bólek toqtaldy. AQSh Kongresiniń ókilderi qabyldaǵan jarııaly málimdemeleri ekijaqty keńeıtilgen strategııalyq seriktestiktiń qarqyndy damýynyń taǵy bir dáleli bolyp tabylady.
