اقوردا سايتىندا مەملەكەت باسشىسى قاسىم-جومارت توقاەۆتىڭ تاۋەلسىزدىك كۇنىنە وراي وتكەن مەملەكەتتىك ناگرادالار مەن سىيلىقتاردى تاپسىرۋ راسىمىندە سويلەگەن ءسوزى جاريالاندى.
قادىرلى قاۋىم!
ارداقتى اعايىن!
بارشاڭىزدى قاستەرلى تاۋەلسىزدىگىمىزدىڭ 30 جىلدىق مەرەيتويىمەن شىن جۇرەكتەن قۇتتىقتايمىن! بۇل – ۇلت مەرەيىن وسىرەتىن ۇلىق مەيرام. ءبىز تاريح تۇرعىسىنان العاندا قىسقا مەرزىم ىشىندە جاڭا قازاقستاننىڭ نەگىزىن قالادىق. تۇعىرى بەرىك، ەكونوميكاسى قۋاتتى، بەدەلى بيىك مەملەكەتكە اينالدىق. مۇنىڭ ءبارى، ەڭ الدىمەن، ەلباسى نۇرسۇلتان ءابىشۇلى نازارباەۆتىڭ كورەگەن ساياساتىنىڭ جەمىسى.
سونىمەن بىرگە، بۇكىل حالقىمىزدىڭ ەرەن ەڭبەگىنىڭ ناتيجەسى. كەز-كەلگەن حالىقتىڭ تابىسقا جەتۋى ازاماتتارىنا بايلانىستى. بۇل – ءومىردىڭ زاڭى. ادام كاپيتالى مىقتى مەملەكەت بارلىق قيىندىقتى ەڭسەرە الادى. تاۋەلسىزدىك كەزەڭىندە حالقىمىز ەلدىكتىڭ بىرەگەي ۇلگىسىن كورسەتتى.
«ەڭبەك – ىرىستىڭ بۇلاعى، باقىتتىڭ شىراعى» دەپ بەكەر ايتىلماعان. شىن مانىندە، ءبىزدىڭ بۇگىنگى جەتىستىگىمىز – بارشا حالقىمىزدىڭ ورتاق جەڭىسى. جاڭا قازاقستاندى وركەندەتۋگە ازاماتتارىمىزدىڭ كوبى سۇبەلى ۇلەس قوستى. بۇگىنگى مەرەيلى ساتتە ەلىمىزدىڭ بارشا ازاماتتارىنا تاباندى ەڭبەگى ءۇشىن زور العىس ايتامىن.
بۇگىن وزدەرىڭىزدى ماراپاتتاي وتىرىپ، قازاقستاندى كوركەيتۋگە ۇلەس قوسقان بارلىق ازاماتقا ريزاشىلىق بىلدىرەمىز. سىزدەر ناعىز وتانشىلدىقتىڭ، كاسىبي بىلىك پەن ادال ەڭبەكتىڭ وزىق ۇلگىسىن كورسەتتىڭىزدەر. وسكەلەڭ ۇرپاق وزدەرىڭىزگە قاراپ بوي تۇزەيدى. وسىدان ءبىر جىل بۇرىن مەن ۇلكەن مەرەيتويدى شۋسىز، داڭعازاسىز، ىسىراپسىز، ناقتى جۇمىستارمەن اتاپ ءوتۋ قاجەتتىگى تۋرالى ايتتىم. تاۋەلسىزدىگىمىزدىڭ 30 جىلدىعىندا جاڭا، اۋقىمدى رەفورمالار قولعا الىندى. سوندىقتان، بۇل جىلدى ناتيجەلى بولدى دەۋگە تولىق نەگىز بار. ءبىز ەكونوميكانى جانە الەۋمەتتىك سالانى جان-جاقتى جاڭعىرتىپ جاتىرمىز. ىندەتكە قاراماستان، مەملەكەت وتاندىق بيزنەسكە قولداۋ كورسەتۋدە.
