Aqorda saıtynda Memleket basshysy Qasym-Jomart Toqaevtyń Táýelsizdik kúnine oraı ótken memlekettik nagradalar men syılyqtardy tapsyrý rásiminde sóılegen sózi jarııalandy.
Qadirli qaýym!
Ardaqty aǵaıyn!
Barshańyzdy qasterli Táýelsizdigimizdiń 30 jyldyq mereıtoıymen shyn júrekten quttyqtaımyn! Bul – ult mereıin ósiretin ulyq meıram. Biz tarıh turǵysynan alǵanda qysqa merzim ishinde jańa Qazaqstannyń negizin qaladyq. Tuǵyry berik, ekonomıkasy qýatty, bedeli bıik memleketke aınaldyq. Munyń bári, eń aldymen, Elbasy Nursultan Ábishuly Nazarbaevtyń kóregen saıasatynyń jemisi.
Sonymen birge, búkil halqymyzdyń eren eńbeginiń nátıjesi. Kez-kelgen halyqtyń tabysqa jetýi azamattaryna baılanysty. Bul – ómirdiń zańy. Adam kapıtaly myqty memleket barlyq qıyndyqty eńsere alady. Táýelsizdik kezeńinde halqymyz eldiktiń biregeı úlgisin kórsetti.
«Eńbek – yrystyń bulaǵy, baqyttyń shyraǵy» dep beker aıtylmaǵan. Shyn máninde, bizdiń búgingi jetistigimiz – barsha halqymyzdyń ortaq jeńisi. Jańa Qazaqstandy órkendetýge azamattarymyzdyń kóbi súbeli úles qosty. Búgingi mereıli sátte elimizdiń barsha azamattaryna tabandy eńbegi úshin zor alǵys aıtamyn.
Búgin ózderińizdi marapattaı otyryp, Qazaqstandy kórkeıtýge úles qosqan barlyq azamatqa rızashylyq bildiremiz. Sizder naǵyz otanshyldyqtyń, kásibı bilik pen adal eńbektiń ozyq úlgisin kórsettińizder. Óskeleń urpaq ózderińizge qarap boı túzeıdi. Osydan bir jyl buryn men úlken mereıtoıdy shýsyz, dańǵazasyz, ysyrapsyz, naqty jumystarmen atap ótý qajettigi týraly aıttym. Táýelsizdigimizdiń 30 jyldyǵynda jańa, aýqymdy reformalar qolǵa alyndy. Sondyqtan, bul jyldy nátıjeli boldy deýge tolyq negiz bar. Biz ekonomıkany jáne áleýmettik salany jan-jaqty jańǵyrtyp jatyrmyz. Indetke qaramastan, memleket otandyq bızneske qoldaý kórsetýde.
