داڭعازاسىز مەرەيتوي: پرەزيدەنت تاۋەلسىزدىكتىڭ 30 جىلدىعىنداعى اۋقىمدى رەفورمالاردى ايتتى

805
Adyrna.kz Telegram

اقوردادا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ تاۋەلسىزدىگىمىزدىڭ 30 جىلدىعىندا قولعا الىنعان جاڭا اۋقىمدى رەفورمالار تۋرالى ايتىپ بەردى، دەپ حابارلايدى قازاقپارات.

«بۇگىن وزدەرىڭىزدى ماراپاتتاي وتىرىپ، قازاقستاننىڭ كوركەيتۋگە ۇلەس قوسقان بارلىق ازاماتقا ريزاشىلىق بىلدىرەمىز. سىزدەر ناعىز وتانشىلدىقتىڭ، كاسىبي بىلىك پەن ادال ەڭبەكتىڭ وزىق ۇلگىسىن كورسەتتىڭىزدەر. وسكەلەڭ ۇرپاق وزدەرىڭىزگە قاراپ بوي تۇزەيدى. وسىدان ءبىر جىل بۇرىن مەن ۇلكەن مەرەيتويدى شۋسىز، داڭعازاسىز، ىسىراپسىز ناقتى جۇمىستارمەن اتاپ ءوتۋ قاجەتتىگىن ايتتىم. تاۋەلسىزدىگىمىزدىڭ 30 جىلدىعىنا جاڭا اۋقىمدى رەفورمالار قولعا الىندى. سوندىقتان، بۇل جىلدى ناتيجەلى بولدى دەۋگە تولىق نەگىز بار»، - دەدى مەملەكەت باسشىسى ناگرادالار يەگەرلەرىن ماراپاتتاۋ راسىمىندە.

پرەزيدەنت ەكونوميكا مەن الەۋمەتتىك سالالار جان-جاقتى جاڭعىرتىلىپ جاتقانىن ەسكە سالدى. ىندەتكە قاراماستان مەملەكەت وتاندىق بيزنەسكە قولداۋ كورسەتۋدە.

«ونەركاسىپ، اۋىل شارۋاشىلىعى، قۇرىلىس سالاسى، قارجى سەكتورى جۇيەلى تۇردە دامىپ كەلەدى. وڭىرلەردە ءىرى ينفراقۇرىلىمدىق جوبالار ىسكە اسىرىلۋدا. كەشەندى جاڭعىرتۋ ءبىلىم بەرۋ جانە دەنساۋلىق ساقتاۋ سالاسىندا دا ءجۇرىپ جاتىر. مەملەكەت ءوزىنىڭ الەۋمەتتىك مىندەتتەمەلەرىن ورىندايدى، زەينەتاقىنى، جاردەماقىنى، جالاقىنى تۇراقتى ارتتىرادى. مەملەكەتتىك باسقارۋ جۇيەسىندە دە ۇلكەن وزگەرىستەر بولدى. ازاماتتاردىڭ ءومىر ءسۇرۋ ساپاسىن جاقسارتۋعا جانە ەلدىڭ باسەكەگە قابىلەتتىلىگىن كۇشەيتۋگە باعىتتالعان 10 ۇلتتىق جوبانى بەكىتتىم. قوعامدىق ساياسي سالادا ەلەۋلى وزگەرىستەر جاسالۋدا. مەن ۇسىنعان ساياسي رەفورمالار توپتاماسى كەزەڭ-كەزەڭىمەن جۇزەگە اسىرىلىپ جاتىر. ءبىز تاۋەلسىز قازاقستان تاريحىندا العاش رەت اۋىل اكىمدەرىن تىكەلەي سايلاۋدى وتكىزدىك.

بيىل ماۋسىم ايىندا ادام قۇقىقتارى سالاسىنداعى الداعى شارالار تۋرالى جارلىققا قول قويدىم. بۇل قۇجات قۇقىق قورعاۋ سالاسىن كەشەندى تۇردە جاڭىرتۋعا باعىتتالعان. قوعامدىق ديالوگتى بىرتىندەپ دامىتۋ ءۇشىن ناقتى شارالار قولعا الىنىپ جاتىر. مۇنىڭ ءبارى ازاماتتارىمىزدىڭ شەشىم قابىلداۋ جانە مەملەكەتتىك باسقارۋ ىسىنە بەلسەندى قاتىسۋىنا جول اشادى»، - دەدى قاسىم-جومارت توقاەۆ.

 

پىكىرلەر