Dańǵazasyz mereıtoı: Prezıdent Táýelsizdiktiń 30 jyldyǵyndaǵy aýqymdy reformalardy aıtty

804
Adyrna.kz Telegram

Aqordada Qazaqstan Respýblıkasynyń Prezıdenti Qasym-Jomart Toqaev Táýelsizdigimizdiń 30 jyldyǵynda qolǵa alynǵan jańa aýqymdy reformalar týraly aıtyp berdi, dep habarlaıdy QazAqparat.

«Búgin ózderińizdi marapattaı otyryp, Qazaqstannyń kórkeıtýge úles qosqan barlyq azamatqa rızashylyq bildiremiz. Sizder naǵyz otanshyldyqtyń, kásibı bilik pen adal eńbektiń ozyq úlgisin kórsettińizder. Óskeleń urpaq ózderińizge qarap boı túzeıdi. Osydan bir jyl buryn men úlken mereıtoıdy shýsyz, dańǵazasyz, ysyrapsyz naqty jumystarmen atap ótý qajettigin aıttym. Táýelsizdigimizdiń 30 jyldyǵyna jańa aýqymdy reformalar qolǵa alyndy. Sondyqtan, bul jyldy nátıjeli boldy deýge tolyq negiz bar», - dedi Memleket basshysy nagradalar ıegerlerin marapattaý rásiminde.

Prezıdent ekonomıka men áleýmettik salalar jan-jaqty jańǵyrtylyp jatqanyn eske saldy. Indetke qaramastan memleket otandyq bızneske qoldaý kórsetýde.

«Ónerkásip, aýyl sharýashylyǵy, qurylys salasy, qarjy sektory júıeli túrde damyp keledi. Óńirlerde iri ınfraqurylymdyq jobalar iske asyrylýda. Keshendi jańǵyrtý bilim berý jáne densaýlyq saqtaý salasynda da júrip jatyr. Memleket óziniń áleýmettik mindettemelerin oryndaıdy, zeınetaqyny, járdemaqyny, jalaqyny turaqty arttyrady. Memlekettik basqarý júıesinde de úlken ózgerister boldy. Azamattardyń ómir súrý sapasyn jaqsartýǵa jáne eldiń básekege qabilettiligin kúsheıtýge baǵyttalǵan 10 ulttyq jobany bekittim. Qoǵamdyq saıası salada eleýli ózgerister jasalýda. Men usynǵan saıası reformalar toptamasy kezeń-kezeńimen júzege asyrylyp jatyr. Biz Táýelsiz Qazaqstan tarıhynda alǵash ret aýyl ákimderin tikeleı saılaýdy ótkizdik.

Bıyl maýsym aıynda adam quqyqtary salasyndaǵy aldaǵy sharalar týraly Jarlyqqa qol qoıdym. Bul qujat quqyq qorǵaý salasyn keshendi túrde jańyrtýǵa baǵyttalǵan. Qoǵamdyq dıalogty birtindep damytý úshin naqty sharalar qolǵa alynyp jatyr. Munyń bári azamattarymyzdyń sheshim qabyldaý jáne memlekettik basqarý isine belsendi qatysýyna jol ashady», - dedi Qasym-Jomart Toqaev.

 

Pikirler