نۇرسۇلتان نازارباەۆ سالتاناتتى راسىمگە قاتىسۋشىلاردى قازاقستان تاۋەلسىزدىگىنىڭ وتىز جىلدىعىمەن قۇتتىقتاپ، بۇل ايتۋلى مەرەكە ەل جەتىستىكتەرىنىڭ جارقىن سيمۆولى ەكەنىنە نازار اۋداردى، دەپ حابارلايدى elbasy.kz.
– قازاقستان وسى جىلدار ىشىندە حالقىمىزدىڭ يگىلىگى جولىندا اۋقىمدى ماقساتتارعا ۇمتىلدى. ءبىز ەلىمىزدىڭ الەمدە لايىقتى ورىن الىپ، مارتەبەلى مەملەكەتكە اينالۋى ءۇشىن ايانباي ەڭبەك ەتتىك. اتا-بابامىزدىڭ سان عاسىرلار بويى اڭساعان ارمانىن اقيقاتقا اينالدىرۋ ۇلى ميسسياسى ءبىزدىڭ بۋىنعا بۇيىرعانىن ماقتان تۇتامىن. بۇگىن پرەزيدەنت جارلىعىمەن ءبىر توپ ازامات ماراپاتتالدى. سونىڭ ىشىندە سىزدەر دە بارسىزدار. تاۋەلسىزدىك كۇنى قارساڭىندا بۇل ناگرادالاردى تاپسىرۋ مەن ءۇشىن ۇلكەن مارتەبە. سىزدەر قازاقستاننىڭ دامۋى مەن گۇلدەنۋىنە زور ۇلەس قوسىپ جۇرسىزدەر، – دەدى ەلباسى.
ءىس-شارا بارىسىندا مەملەكەت جانە قوعام قايراتكەرلەرى، سونداي-اق بيزنەس قوعامداستىعى وكىلدەرى ماراپاتتالدى. قازاقستاننىڭ تۇڭعىش پرەزيدەنتى «ۆتب بانكى» پرەزيدەنتى – باسقارما توراعاسى اندرەي كوستيننىڭ قازاقستان-رەسەي قارىم-قاتىناسىن نىعايتۋ ىسىندەگى جانە ەكى ەلدىڭ ينتەگراتسيالىق ۇدەرىستەرى اياسىندا ينۆەستيتسيا-بانك سەكتورىن دامىتۋداعى ەڭبەگىن ەرەكشە اتاپ ءوتتى. نۇرسۇلتان نازارباەۆ قازاقستان مەن رەسەي اراسىنداعى ستراتەگيالىق ىنتىماقتاستىقتى ودان ءارى تەرەڭدەتۋ قاجەتتىگىنە توقتالىپ، بۇل پروتسەستەگى بيزنەس وكىلدەرىنىڭ ايرىقشا رولىنە ءمان بەردى.
ەلباسى استانا جانە قازاقستان ءميتروپوليتى الەكساندردى ماراپاتتاپ، كونفەسسياارالىق ديالوگتى ىلگەرىلەتۋدەگى، قوعامداعى تىنىشتىق پەن تۇراقتىلىقتى ساقتاۋداعى پراۆوسلاۆ شىركەۋىنىڭ ماڭىزدى ءرولىن اتاپ ءوتتى.
سونىمەن بىرگە «Nur Otan» پارتياسى توراعاسىنىڭ ءبىرىنشى ورىنباسارى ب.بايبەككە، نۇرسۇلتان نازارباەۆ قورىنىڭ اتقارۋشى ديرەكتورى ق.جۇماباەۆقا، قازاقستان رەسپۋبليكاسى كونستيتۋتسيالىق كەڭەسىنىڭ توراعاسى ق.ماميگە، جازۋشى، مەملەكەتتىك سىيلىقتىڭ لاۋرەاتى د.يسابەكوۆكە، «قازمۇنايگاز» ۇلتتىق كومپانياسى» اكتسيونەرلىك قوعامى باسقارماسىنىڭ توراعاسى ا.ايدارباەۆقا، «ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعى» اكتسيونەرلىك قوعامى باسقارماسىنىڭ توراعاسى ب.بايماحانوۆقا، «Bazis-ا» كومپانياسى ديرەكتورلار كەڭەسىنىڭ توراعاسى ا.بەلوۆيچكە، قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كومەكشىسى ءا.تۇرسىنوۆقا، الپينيست م.اۋەزوۆاعا مەملەكەتتىك ماراپاتتار تاپسىرىلدى.
– سىزدەر ءاردايىم جاڭا يدەيالاردى ءتيىمدى جۇزەگە اسىرىپ كەلەسىزدەر. بارشاڭىزعا ەل يگىلىگى جولىنداعى جەمىستى قىزمەتتەرىڭىز ءۇشىن زور ريزاشىلىعىمدى بىلدىرەمىن. وتىز جىلدا ءبىز قازاقستاننىڭ ىلگەرى باسۋى مەن وركەندەۋى ءۇشىن قولدان كەلگەننىڭ ءبارىن جاسادىق. بۇل ناگرادالار – سىزدەردىڭ قازاقستان مەن ونىڭ حالقى الدىنداعى ەڭبەكتەرىڭىزدىڭ لايىقتى باعالانۋىنىڭ نىشانى، – دەدى قازاقستاننىڭ تۇڭعىش پرەزيدەنتى.
