قازاقستان تاۋەلسىزدىگىنىڭ 30 جىلدىعىنا وراي «قازاقپارات» حاا» اق ەلەكتروندى نۇسقادا «تاۋەلسىزدىك تۋرالى 100 اڭگىمە» كىتابىن شىعاردى. قازاق، ورىس جانە اعىلشىن تىلىندەگى ەلەكتروندى كىتاپ - 1991 جىلدان باستاپ بۇگىنگى كۇنگە دەيىنگى سوڭعى ءۇش ونجىلدىقتاعى قازاقستان تاۋەلسىزدىگىنىڭ جەتىستىكتەرىمەن تىكەلەي نەمەسە جاناما بايلانىستى بىرەگەي وقيعالار الماناحى.
سپيكەرلەردىڭ كوپشىلىگى تاريحي وقيعانىڭ كۋاگەرى بولا وتىرىپ، وزدەرىنىڭ جەكە ەستەلىكتەرى مەن ەموتسيالارىمەن بولىسەدى، ەل دامۋىنىڭ ءاربىر ناقتى كەزەڭىنىڭ بۇرىن بەلگىسىز بولعان بولشەكتەرىن ەسكە الادى. سونىمەن قاتار، بۇل كىتاپتا سوڭعى 30 جىل ىشىندەگى ەكونوميكالىق، قوعامدىق-ساياسي جانە مادەني پروتسەستەردى تالدايتىن سالالىق ساراپشىلاردىڭ پىكىرلەرى كەلتىرىلگەن.
اڭگىمەلەردە قازاقستان رەسپۋبليكاسىنىڭ تۇڭعىش پرەزيدەنتى-ەلباسى نۇرسۇلتان ءابىشۇلى نازارباەۆتىڭ ساياساتتاعى بەينەسى ەرەكشە ورىن الادى.«قازاقپارات» حاا وقىرماندار نازارىنا وسى كىتاپتان ۇزىندىلەر جاريالايدى.
دامۋدىڭ جاڭا پاراديگماسى ماۋلەن اشىمباەۆ قر پارلامەنتى سەناتىنىڭ توراعاسى، مەملەكەت قايراتكەرى
تاۋەلسىزدىك العاننان كەيىن بۇرىنعى كەڭەس وداعى كەڭىستىگىندە بولعان كۇردەلى ءارى جۇيەلى داعدارىستىڭ ءبارى دە بىرتىندەپ قازاقستانعا مۇراعا قالدى. بارلىق شەشىلمەگەن پروبلەمالار – ءتيىمسىز كوماندالىق-اكىمشىلىك ەكونوميكا، كۇيرەگەن الەۋمەتتىك سالا، ءتۇبى بوس قازىنا، ينفلياتسيا جانە باسقالارى – كسرو ىدىراعاننان كەيىن قۇرىلعان تاۋەلسىز مەملەكەتتەرگە بىرتىندەپ ءوتتى. وسى اۋقىمدى گەوساياسي ىعىسۋدىڭ ناتيجەسىندە پوستكەڭەستىك رەسپۋبليكالار اراسىنداعى بارلىق شارۋاشىلىق بايلانىستار كۇرت جويىلدى. مىسالى، قازاقستاننىڭ ونەركاسىبىندەگى الپاۋىتتار شىعاراتىن ونىمدەردىڭ شامامەن 90%-ى وداقتىق نارىققا باعدارلانعان جانە كەرىسىنشە سولاردان جەتكىزىلەتىن شيكىزاتتارعا تاۋەلدى بولعان-تىن. 1990-شى جىلداردىڭ باسىندا قازاقستاننىڭ ەڭ ءىرى 130 كاسىپورنىنىڭ جۇمىسىندا ىركىلىستەر باستالدى، كەيبىرى جۇمىسىن توقتاتتى، قايسىبىرى ءوندىرىس كولەمىن كۇرت قىسقارتتى.
يندۋستريانىڭ 100 مىڭنان استام ادام – يندۋستريانىڭ جوعارى بىلىكتى ماماندارى – جۇمىسسىز قالدى. 1991-1992 جىلدارى ونەركاسىپتىڭ كۇرت قۇلدىراۋى سالدارىنان ينفلياتسيا 1000 پايىزعا دەيىن جەتتى. بۇل كۇن سايىن باعالار ايتارلىقتاي ءوسىپ بارا جاتقان، ال جالاقى مەن زەينەتاقىنى تولەۋ قايتا-قايتا كەشىكتىرىلەتىن كەزەڭ بولدى.
