بۇگىن شىمكەنت قالاسىندا ەل تاۋەلسىزدىگىنىڭ 30 جىلدىق مەرەيتويىنا ارنالعان «ەل باقىتىن تەربەتكەن – تاۋەلسىزدىك!» اتتى سالتاناتتى جيىن ءوتتى. شاراعا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ، قالا اكىمى مۇرات ايتەنوۆ، زيالى قاۋىم وكىلدەرى، بارلىق سالانىڭ ماماندارى مەن ەڭبەك ازاماتتارى قاتىستى.
مەرەكەلىك ءىس-شارا مەملەكەتتىك گيمننىڭ ورىندالۋىمەن باستالدى.
جيىندا ءسوز العان قالا باسشىسى بارشا جۇرتشىلىقتى جەتكەن بيىگىمىزدى سارالاپ، بولاشاعىمىزدىڭ باعدارىن بەلگىلەپ بەرگەن تاۋەلسىزدىكتىڭ 30 جىلدىق مەرەكەسىمەن قۇتتىقتادى.
«ەلباسىمىزدىڭ كوشباسشىلىعىمەن قازاقستان حالقى مەملەكەت قۇرۋ ميسسياسىن ورىندادى. نۇرسۇلتان ءابىشۇلى ءوزىنىڭ «تاۋەلسىزدىك ساباقتارى» ماقالاسىندا قازاقستاننىڭ الەمدە ءوز تۋىن تۇعىرعا قوندىرعان ەكى جۇزدەن اسا ەلدىڭ ىشىندە بار-جوعى 30 جىلدىڭ ىشىندە العاشقى 40 ەلدىڭ قاتارىنا قوسىلعانىن اتاپ ءوتتى. وسى جىلدار حالقىمىز ءجۇرىپ وتكەن جول جاسامپازدىقتىڭ ۇلى داۋىرىنە اينالدى. ءاربىر جىل عاسىر جۇگىن ارقالادى. حالقىمىزدىڭ مىقتى مەملەكەت قۇرۋ، باقۋاتتى ومىرگە جەتۋ جولىنداعى ۇلى كوشىنە بايتاق قازاقستان جۇرتى تۇگەل ۇلەس قوستى. بۇگىنگى قازاقستاننىڭ قالىپتاسقان مەملەكەتكە اينالۋى، الەمدىك دەڭگەيدە تانىلىپ، مويىندالۋى جانە قۋاتتى ەكونوميكا قۇرىپ، گۇلدەنۋى – حالقىمىزدىڭ ەرەن ەڭبەگىنىڭ ناتيجەسى»،- دەدى ءوز قۇتتىقتاۋ سوزىندە م.ايتەنوۆ.
سونىمەن بىرگە اكىم سالتاناتتى جيىنعا ارنايى كەلىپ قاتىسىپ، قۋانىشتى ءساتتى بولىسكەن قازاقستان رەسپۋبليكاسىنىڭ مەملەكەتتىك حاتشىسى قىرىمبەك ەلەۋۇلى كوشەرباەۆقا شىمكەنت تۇرعىندارى اتىنان العىسىن جەتكىزىپ ساحناعا شاقىردى.
قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ قالا تۇرعىندارىن ەلىمىز ءۇشىن ماڭىزدى تاريحي بەلەسپەن قۇتتىقتاي وتىرىپ، قازاقستاندىقتار وسى جىلداردا تۇعىرى مىعىم، قۋاتتى مەملەكەت قۇرا بىلگەندىگىن اتاپ ءوتتى.
«ءبىز – ىنتىماقتى ۇران، تاتۋلىقتى تۋ ەتكەن بەيبىت حالىقپىز. بۇگىنگى مەملەكەتىمىزدىڭ قارقىندى دامۋى – تۇراقتى ساياسات پەن ىشكى بىرلىكتىڭ ارقاسى. ۇلتتىق قاسيەتىمىز بەن ۇلتتىق قۇندىلىقتارىمىزدى ۇلىقتاي بىلگەنىمىزدىڭ جەمىسى. سوندىقتان بىرلىگىمىز بەكەم، تىرلىگىمىز تياناقتى بولعاندا عانا تاۋەلسىزدىكتىڭ تۋى ماڭگى جەلبىرەيتىنىن ەستەن شىعارماعانىمىز ابزال.وتىز جىلدا قازاق حالقى اسىققانىنا جەتىپ، اڭساعانىن كوردى. تاۋەلسىزدىك ۇلتتىق نامىسىمىزدى وياتتى. تاۋەلسىزدىك قازاقتى الەمگە ازاتتىق سۇيگىش، رۋحى بيىك، نامىسى بەرىك حالىق رەتىندە تانىتتى. اتا-بابامىز عاسىرلار بويى ارمانداپ وتكەن ەگەمەن ەل بولۋ مارتەبەسىن كورۋ – بۇگىنگى ۇرپاققا بۇيىرعان زور باقىت. وسى وتىز جىلدا مەملەكەت جاڭعىرىپ، ۇلت قايتا تۇلەدى. تاۋەلسىزدىك جىلدارى بوي كوتەرگەن عاجايىپ ەلوردا وتانىمىزدىڭ جۇرەگىنە، تاۋەلسىزدىگىمىزدىڭ تىرەگىنە اينالدى. حالقىمىز ماقتان ەتەتىن ەلىمىزدىڭ بارلىق وڭىرلەرىندە دە ۇلانعايىر جاسامپازدىق ىستەر اتقارىلدى. مۇنىڭ ءوزى ءبىزدىڭ قۋاتتى ەل ەكەنىمىزدى پاش ەتتى. سىزدەردىڭ قالالارىڭىز دا باسقا وڭىرلەر سياقتى ەل ەكونوميكاسىنىڭ دامۋىنا جىلدان-جىلعا ۇلەس قوسىپ كەلەدى. ەلىمىزدىڭ وڭتۇستىگىندە ورنالاسقان ءۇشىنشى مەگاپوليس، قازاقىلىقتىڭ قايماعى ساقتالعان شىرايلى شىمكەنت قالاسىنا ەلباسىنىڭ جارلىعىمەن ارنايى ستاتۋس بەرىلگەننەن كەيىن شاھاردىڭ دامۋى تىڭ سەرپىن الدى. يندۋستريالاندىرۋ باعدارلاماسى بويىنشا جالپى قۇنى 221,5 ميلليارد تەڭگەنى قۇرايتىن 127 جوبا ىسكە استى. 2018 جىلدان بەرى قالا ەكونوميكاسىنا 1,3 تريلليون تەڭگە ينۆەستيتسيا تارتىلدى. الداعى ۋاقىتتا دا بۇل قارقىندى تومەندەتپەۋ كەرەك»،-دەدى مەملەكەتتىك حاتشى.
قىرىمبەك كوشەرباەۆ ۇلىسىمىز ءۇشىن ۇلىق، مەملەكەتىمىز ءۇشىن مارتەبەلى مەرەكە – تاۋەلسىزدىكتىڭ 30 جىلدىعى قارساڭىندا قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ ەلىمىزدىڭ قوعامدىق-ساياسي، الەۋمەتتىك-ەكونوميكالىق دامۋىنا ەرەكشە ۇلەس قوسىپ جۇرگەن ازاماتتاردى مەملەكەتتىك ناگرادالارمەن ماراپاتتادى. ولاردىڭ قاتارىندا شىمكەنت شاھارىنىڭ تۇرعىندارى دا بار ەكەنىن ايتىپ، ەلىمىزدىڭ ءوسىپ-وركەندەۋىنە ەڭبەك سىڭىرگەن 34 ازاماتتى قالا اكىمى مۇرات ايتەنوۆپەن بىرگە تابىستادى.
سالتاناتتى جيىن ونەر جۇلدىزدارىنىڭ مەرەكەلىك كونتسەرتىمەن جالعاستى.
شىمكەنت قالاسى اكىمدىگىنىڭ ءباسپاسوز قىزمەتى
