قر تاۋەلسىزدىگىنىڭ 30 جىلدىعىنا وراي شىمكەنت قالاسىنىڭ ءنۇرسات شاعىناۋدانىنداعى №104, 105 كوپ قاباتتى تۇرعىن ۇيلەردىڭ كىلتتەرىن تابىستاۋ ءراسىمى ءوتتى. ءىس-شاراعا شىمكەنت قالاسىنا جۇمىس ساپارىمەن كەلگەن قر مەملەكەتتىك حاتشىسى قىرىمبەك كوشەرباەۆ، قالا اكىمى مۇرات ايتەنوۆ قاتىستى.
قالادا تۇرعىن ءۇي كەزەگىندە تۇرعان 112 وتباسى جاڭا پاتەرلەردىڭ كىلتىنە يە بولدى. ولاردىڭ بارلىعى – كوپ بالالى جانە الەۋمەتتىك جاعىنان ءالسىز توپتاعى وتباسىلار.
قر مەملەكەتتىك حاتشىسى ق.كوشەرباەۆ پەن قالا اكىمى م.ايتەنوۆ شىمكەنتتىكتەردى تاۋەلسىزدىك مەرەكەسىمەن قۇتتىقتاپ، وتباسىلارعا كوپتەن كۇتكەن پاتەر كىلتتەرىن تابىستادى.
«قالانىڭ جاڭا دامۋ باعدارى ايقىندالدى. ونىڭ بولاشاعىنان ۇلكەن ءۇمىت كۇتەمىز. شىمكەنتتى جايلى قالاعا اينالدىرۋدا ۇلكەن جۇمىستار اتقارىلۋدا. بيىل 1 ملن. شارشى مەتر الاڭى بار تۇرعىن ءۇي پايدالانۋعا بەرىلۋدە. بۇل بۇرىن-سوڭدى بولماعان كورسەتكىش. حالقىمىزدىڭ سانى ارتىپ كەلەدى. تۇرعىندار سانى ەسەلەپ وسە بەرسىن»، - دەدى شاراعا قاتىسقان قىرىمبەك كوشەرباەۆ.
قالا اكىمى حالىقتى تۇرعىن ۇيمەن قامتۋ سالاسىندا اۋقىمدى جۇمىستار اتقارىلىپ جاتقانىن جەتكىزدى. بيىل 676 ازامات ساتىپ الۋ قۇقىعىنسىز ارەندالىق پاتەرمەن قامتاماسىز ەتىلمەك. سونىمەن قاتار، اعىمداعى جىلى «نۇرلى جەر» مەملەكەتتىك باعدارلاماسىنىڭ اياسىندا 20 كوپ قاباتتى تۇرعىن ءۇي كۇردەلى جوندەۋدەن ءوتتى.
ءنۇرسات شاعىناۋدانىندا ورنالاسقان 9 قاباتتى ەكى تۇرعىن ءۇيدىڭ قۇرىلىسىن مەردىگەر «كورپوراتسيا اق ورداسى» جشس جۇرگىزدى. 2019 جىلى باستالعان قۇرىلىس جۇمىستارى بيىل جەلتوقسان ايىندا اياقتالدى. پاتەرلەردىڭ جالپى اۋدانى – 6 230 شارشى مەتر.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، جۇمىس ىستەيتىن جاستاردى باسپانامەن قامتۋ جۇمىسى دا جالعاسۋدا. بيىل وسىنداي 300 جاسقا 5 جىلعا ارەندالىق پاتەر تابىس ەتىلدى. الداعى ۋاقىتتا تاعى 900 پاتەرمەن قامتۋ جوسپارلانىپ وتىر.
وسىدان 3 جىل بۇرىن شىمكەنتتە 430 مىڭ شارشى مەتر تۇرعىن ءۇي پايدالانۋعا بەرىلسە، بيىل بۇل كورسەتكىش 1 ميلليون شارشى مەترگە جەتتى. 2023 جىلدىڭ سوڭىنا دەيىن قالادا تاعى 3 ميلليون شارشى مەتر تۇرعىن ءۇي سالىنادى.
شىمكەنت قالاسى اكىمدىگىنىڭ ءباسپاسوز قىزمەتى
