ۇستىمىزدەگى جىلدىڭ 11 ايىندا شىمكەنتكە تارتىلعان ينۆەستيتسيا كولەمى وتكەن جىلدىڭ سايكەس كەزەڭىمەن سالىستىرعاندا 55 پايىزعا ارتىپ، 392,4 ملرد تەڭگەدەن استى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قالا باسشىسى مۇرات ايتەنوۆ ءمالىم ەتتى.
ونىڭ ايتۋىنشا، ينۆەستيتسيا تارتۋ ماقساتىندا 5 جىلدىق جوسپار بويىنشا 2,6 ترلن تەڭگەگە 282 جوبانى ىسكە اسىرىپ، 20 مىڭ جۇمىس ورنىن قۇرۋ قاجەت. سونىمەن قاتار، شاعىن جانە ورتا كاسىپكەرلىكتىڭ تيىمدىلىگىن ارتتىرۋ ماقساتىندا «قاراپايىم زاتتار ەكونوميكاسى» جانە «بيزنەستىڭ جول كارتاسى» باعدارلامالارىنىڭ مەرزىمىن 1 جىلعا ۇزارتۋ جونىندە شەشىم قابىلداندى. بۇل كاسىپكەرلەر ءۇشىن ۇلكەن مۇمكىندىك.
«قالادا «بيزنەستىڭ جول كارتاسى-2025» مەملەكەتتىك باعدارلامالارى شەڭبەرىندە 8,9 ملرد تەڭگە بولىنگەن. بۇگىندە باعدارلاما شەڭبەرىندە 7,8 ملرد تەڭگەگە 1 946 جوباعا قولداۋ كورسەتىلدى. «قاراپايىم زاتتار ەكونوميكاسى» باعدارلاماسى اياسىندا 2021 جىلعا 2,9 ملرد تەڭگە ءبولىندى. بۇگىنگى كۇنگە قۇنى 57,8 ملرد تەڭگەنى قۇرايتىن 70 جوباعا 2,5 ملرد تەڭگەگە قولداۋ كورسەتىلدى. اتالعان جۇمىستار كەلەسى جىلى دا جالعاساتىن بولادى. سونىمەن قاتار، «مەن كاسىپكەر بولامىن» جوباسىمەن ايەلدەر مەن جاستار كاسىپكەرلىگىن دامىتۋ ءۇشىن جەرگىلىكتى ءىس-شارا جوسپارى ىسكە اسىرىلۋدا.
اتالعان ءىس-شارا اياسىندا 10 ملن تەڭگەگە دەيىن 1%-دىق شاعىن نەسيەلەر بەرۋ قاراستىرىلعان. بۇل ماقساتقا جەرگىلىكتى بيۋدجەتتەن 1,1 ملرد تەڭگە قارجى ءبولىندى. «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» مەملەكەتتىك باعدارلاماسى اياسىندا 1 ملرد تەڭگەگە 70 جوبا قارجىلاندىرىلدى»، - دەدى سپيكەر.
قالادا كاسىپكەرلەرگە ىڭعايلى جاعداي جاساۋ ءۇشىن «بيزنەسكە ارنالعان ۇكىمەت – Shymkent Invest» كاسىپكەرلەرگە قىزمەت كورسەتۋدىڭ بىرىڭعاي ورتالىعى قۇرىلعان. مۇندا كاسىپكەرلەر بيزنەس-جوسپاردى ازىرلەۋدەن باستاپ جوبانى پايدالانۋعا بەرۋگە دەيىن، ونىڭ ىشىندە بارلىق رۇقسات بەرۋ قۇجاتتارىن قارجىلاندىرۋ جانە راسىمدەۋ بويىنشا سۇيەمەلدەۋمەن بىرگە قىزمەت كورسەتەدى. بۇگىنگە فرونت-كەڭسەنىڭ قىزمەتىنە 34 مىڭنان استام ازامات جۇگىندى.
