جانات سامات: «ماسەلە ناعىز قوقىستان تۇرعىزىلعان تاۋعا اينالدى!»

22397
Adyrna.kz Telegram

قازاقستان رەسپۋبليكاسىنىڭ رەسمي ستاتيستيكاسىنا سايكەس، بىزدەر، ازاماتتار، مەملەكەتتىك سەكتور مەن بيزنەس تاۋەلسىزدىك جىلدارىندا 138 ملن تونناعا جۋىق قاۋىپتى جانە 320 ملن توننا قاۋىپتى ەمەس قالدىقتار جينادىق، دەپ حابارلايدى "ادىرنا" ۇلتتىق پورتالى. 

قاۋىپتىلەردىڭ ىشىندەگى ەڭ العاشقى بەستىككە:

  • كۇل مەن كۇل قالدىقتارى (22,8 ملن توننا)
  • قۇس تەزەگى (1,3 ملن توننا)
  • بۇرعىلىق قالدىقتار (212 توننا)
  • دوڭىز قويمالجىڭى (143 ملن توننا)
  • مۇناي قالدىقتارى (103 مىڭ توننا) كىرەدى.

- بۇنداي كولەمدى كوز الدىڭا ەلەستەتۋدىڭ ءوزى قيىن! 1 ميلليون 300 مىڭ قۇس تەزەگى دەگەندى ويلاپ كورىڭىز! بۇل قوقىستان تۇرعىزىلعان تاۋ ىسپەتتەس، بەلسەندى تۇردە مەتان مەن وزگە دە گازداردى بولەدى. بۇنى قولعا الماسا، سالدارى ناعىز اپاتقا الىپ كەلەدى»، - دەپ مالىمدەدى قر ەكولوگيا، گەولوگيا جانە تابيعي رەسۋرستار مينيسترلىگى جانىنداعى "قورشاعان ورتانى قورعاۋ بويىنشا اقپاراتتىق-ساراپتامالىق ورتالىعى، - رمم باس ديرەكتورى جانات سامات.

ەكولوگيالىق اقپاراتتىق-ساراپتامالىق ورتالىقتىڭ جەتەكشىسىنىڭ ءسوزى بويىنشا، بۇل مالىمەتتەر – رەسمي ستاتيستيكا. ول تابيعي رەسۋرستاردى قولدانۋشىلاردىڭ ەسەبى نەگىزىندە قۇرىلادى. جاڭا ەكولوگيالىق كودەكسكە سايكەس، ولاردى «وپەراتورلار» دەپ اتايدى.

- 2021 جىلدىڭ 1 شىلدەسىنەن باستاپ قر جاڭا ەكولوگيالىق كودەكسىنە (384 باپ) سايكەس، قورشاعان ورتاعا قانداي دا ءبىر زيان كەلتىرەتىن بارلىق سۋبەكتىلەر جىل سايىن قالدىقتاردىڭ ينۆەنتاريزاتسياسى بويىنشا ەسەپ بەرۋگە مىندەتتەلەدى. سونىڭ نەگىزىندە بارلىق وڭىرلەر مەن ەكونوميكالىق قىزمەت تۇرلەرىنەن رەسپۋبليكا بويىنشا تولىق ستاتيستيكا جاسالادى، -  دەپ ءتۇسىندىردى ساراپشى.

قالدىقتاردىڭ حالىقارالىق كلاسسيفيكاتسياسى دەگەنىمىز قوقىستى قاۋىپتى جانە قاۋىپتى ەمەس دەپ ەكى توپقا ءبولۋدى بىلدىرەدى. زاڭدى پوليگوندار مەن سانكتسيالانباعان قوقىس ورىندارىنىڭ اراسىنداعى ايىرماشىلىق تا وسى ىسپەتتەس. سانيتارلىق جانە وزگە دە ستاندارتتاردى قانشا جەردەن ۇستانعانىمىزبەن، بۇل قالدىقتار رەسمي پوليگوندا بولسىن، ستيحيالى قوقىس ورنىندا بولسىن، ەرتە مە، كەش پە ىدىراي باستايدى.

شىندىعىندا، 3 مىڭنان استام زاڭدى پوليگونداردىڭ تەك بەستەن ءبىرى بارلىق ەرەجەلەر مەن نورمالارعا ساي كەلەدى. قاۋىپسىزدىك دەڭگەيى بويىنشا، سۇرىپتاۋدان وتەتىن، ۋاقىتىلى جويىلاتىن ۇلگىلى پوليگوندار نۇر-سۇلتان قالاسىندا دەپ ەسەپتەلگەنمەن، ول وسىنداي دەڭگەيدەگى بۇكىل ەلدەگى جالعىز پوليگون بولۋى دا ىقتيمال.

- تسيفرلى كارتادا جاسىل جەلەكتەردىڭ اراسىندا جۇزدەگەن اپپاق داقتار ايقىن كورىنەدى. جاقىنداتىپ قاراساڭىز، جەم-ءشوپ وسپەيتىن، قوقىسپەن ابدەن كەۋىپ كەتكەن ستيحيالى قوقىس ورىندارى كوسموستان دا كورىنەدى،- دەيدى جانات سامات.

ورتالىق باسشىسىنىڭ ايتۋىنشا، سوڭعى جىلدارى ەلىمىزدەگى قالدىقتاردى مەڭگەرۋ سالاسى جۇيەلەنىپ كەلەدى.

- ەكولوگيا مينيسترلىگى وتە كولەمدى جۇمىس اتقارۋدا. بۇل مالىمەتتەردىڭ بارلىعى گەوسەرۆيس ارقىلى جينالادى، وبلىستارداعى دەپارتامەنتتەر قىزمەتكەرلەرى قوقىس ورىندارىنا بارىپ، پىكىرلەر قالدىرىپ، فوتو-ۆيدەو دەرەكتەر جينايدى. ودان كەيىن اتقارۋشى ورگاندار قالپىنا كەلتىرۋ جۇمىستارىن جۇرگىزەدى.

جاسالعان جۇمىس از ەمەس، بىراق جاسالۋ كەرەك جۇمىس ودان دا كوپ. دامىعان ەلدەردەگى سياقتى قالدىقتاردىڭ يەرارحياسىن ەنگىزەر بولساق، ءبىز، قازاقستاندىقتار، قالدىقتاردى سۇرىپتاۋدى ۇيدە باستاۋىمىز كەرەك.

بۇنداي ءتاسىل قالدىقتاردى مەڭگەرۋدى ءبىرشاما وڭايلاتار ەدى: قوقىس كومپانيالارى قايتا وڭدەۋگە، تىڭايتۋعا جىبەرۋگە نە ەنەرگەتيكالىق ۋتيليزاتسيالاۋعا جىبەرەرىن بىردەن بىلەر ەدى. الايدا، اۋرۋ قالسا دا، ادەت قالمايدى ەمەس پە؟ جانە دە ەلىمىزدە سانكتسيالانباعان ون مىڭداعان قوقىس ورىندارىن كىم تولتىردى؟

- تىعىرىقتان شىعار جول بىرەۋ عانا – قوقىس ورىندارىن قالپىنا كەلتىرىپ، قايتا جاراتۋعا بەيىمدەۋ. ايتپەسە، جەر بەتىندەگى تىرشىلىكتىڭ جويىلۋ قاۋپى باسىم. بىردەن بولماسا دا، بۇل ورىنداردا كەيىن جاسىل جەلەك قايتا وسە باستايدى. قازاقستاندا قالدىقتار توگىلگەن جەرلەر تولىقتاي جويىلمايىنشا بۇل جۇمىس ەشقاشان توقتاماۋى كەرەك!

"ادىرنا" ۇلتتىق پورتالى

پىكىرلەر