شىمكەنت قالاسى ءماسليحاتىنىڭ كەزەكتى ون ەكىنشى سەسسياسىندا قالامىز ءۇشىن بىرقاتار ماڭىزدى شەشىمدەر قارالىپ، ماقۇلداندى. سەسسيا جۇمۆسىنا قالا اكىمى مۇرات ايتەنوۆ قاتىستى.
كۇن تارتىبىنە جالپى 13 ماسەلە شاعىرىلىپ، دەپۋتاتتار تاراپىنان قولداۋ تاپتى.
جيىندا الدىمەن 2022-2024 جىلدارعا ارنالعان قالا بيۋدجەتى بەكىتىلدى. وندا قالاداعى بارلىق مەكتەپتەگى باستاۋىش سىنىپ وقۋشىلارىن ءبىر مەزگىل ىستىق تاماقپەن قامتۋ، جولداردى ورتاشا جانە كۇردەلى جوندەۋ، دەنساۋلىق ساقتاۋ مەكەمەلەرىن جابدىقتاۋ، سپورت جانە مادەنيەت ۇيىرمەلەرىن جان باسىنا قارجىلاندىرۋ، كاسىپكەرلىكتى قولداۋ، قالا اۋماعىن كوگالداندىرۋ، ينفراقۇرىلىم جۇيەلەرىن جۇرگىزۋ سىندى ماڭىزدى سالالارعا قارجى باعىتتالعان.
ناتيجەسىندە كەلەسى جىلعا ارنالعان قالا بيۋدجەتى 468 ملرد. تەڭگە كولەمىندە بەكىتىلدى. ونىڭ 22,4% – دامۋ بيۋدجەتى، 77,6% – اعىمداعى شىعىنداردى قۇرايدى. قالا بيۋدجەتىن ناقتىلاۋ ماسەلەسى قالالىق ءماسليحاتتىڭ تۇراقتى كوميسسيالارىندا، قوعامدىق كەڭەستە جان-جاقتى تالقىلانعان.
سەسسيا جۇمىسى بارىسىندا قالانىڭ بەس جىلدىق دامۋ باعدارلاماسىنىڭ ورىندالۋى تىڭدالىپ، جوسپارعا تولىقتىرۋلار ەنگىزىلدى.
كەلەسى جىلى مەملەكەتتىك-جەكەشەلىك ارىپتەستىك اياسىندا قولايلى ورتا قالىپتاستىرۋ، ساياباقتار مەن سكۆەرلەردى كۇتىپ ۇستاۋ مىندەتتەرى بويىنشا جوبالار ماقۇلداندى.
قالا باسشىسى كۇن تارتىبىندەگى ماسەلەلەر جونىندە ءسوز الىپ، دەپۋتاتتار كورپۋسىنا شىمكەنتتىڭ ءارى قاراي وركەندەۋىنە ىقپال ەتەر شەشىمدەرگە قولداۋ بىلدىرگەنى ءۇشىن العىسىن جەتكىزدى.
– بارشاڭىزدى كەلە جاتقان ەلىمىزدىڭ ۇلىق مەرەكەسى – قازاقستان رەسپۋبليكاسىنىڭ تاۋەلسىزدىگى كۇنىمەن قۇتتىقتايمىن. تاۋەلسىزدىكتىڭ 30 جىلدىعى – قايتا جاڭعىرعان قازاق مەملەكەتتىگىنىڭ، اتا-بابالارىمىز اڭساعان ازاتتىق تۇعىرىنىڭ نىعايا تۇسكەنىن ايگىلەيتىن ماڭىزدى بەلەس. سىزدەردىڭ مەملەكەتىمىزدىڭ جارقىن بولاشاعى جولىنداعى اتقارعان ەڭبەكتەرىڭىزگە تابىس، دەندەرىڭىزگە ساۋلىق تىلەيمىن، -دەدى م.ايتەنوۆ.
جيىن سوڭىندا قالا اكىمى ءماسليحات حاتشىسى باستاعان دەپۋتاتتار كورپۋسىن جانە ءتۇرلى سالادا جەمىستى ەڭبەك ەتكەن بىرقاتار ازاماتتارعا «قر تاۋەلسىزدىگىنىڭ 30 جىلدىعى» مەملەكەتتىك مەرەكەلىك مەدالىن، مەملەكەت باسشىسىنىڭ «العىس حاتىن» جانە قالا اكىمىنىڭ «قۇرمەت گرامموتاسىن» تابىستادى.
شىمكەنت قالاسى اكىمدىگىنىڭ ءباسپاسوز قىزمەتى
