«تاۋەلسىزدىك تاعىلىمى» ماقالاسى ەگەمەندىك كيەلى ۇعىم ەكەنىن انىق كورسەتتى

825

ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆ تاۋەلسىزدىكتىڭ 30 جىلدىق مەرەكەسى قارساڭىندا «تاۋەلسىزدىك تاعىلىمى» اتتى ماقالا جاريالادى. بۇل ماقالادا ەلباسى ءوز حالقىن ايتۋلى مەرەكەمەن قۇتتىقتاي وتىرىپ، وسى وردا بۇزار وتىز جىل ۋاقىت ارالىعىندا جاس مەملەكەت قازاقستاننىڭ باعىندىرعان بەلەسى مەن اسقان اسۋى تولاعاي ەكەنىن تىلگە تيەك ەتتى.

«مەن وتىز جىل بويى حالقىمدى قاناتتىعا قاقتىرماي، تۇمسىقتىعا شوقىتتىرماي، قايراڭعا قالدىرماي، الەمدىك وركەنيەتتىڭ الدىڭعى شەبىنە، دۇنيەدەگى ەڭ دامىعان 40 ەلدىڭ قاتارىنا قوستىم. وسى جىلدار ىشىندە الەمدىك عىلىم مەن مادەنيەتتىڭ ەڭ ۇزدىك جەتىستىكتەرىن مەڭگەرگەن جاڭا ۇرپاق قالىپتاستى» دەي كەلە، «ىنتىماعى جاراسقان ەلدىڭ تابىسى تاسىپ، ابىرويى اسادى. بەرەكەسى قاشقان ەلدىڭ قۋاتى كەمىپ، قۇتى قاشادى. وتىز جىل ىشىندە ءبىز عاسىرلارعا بەرگىسىز دامۋ جولىنان وتتىك»، – دەدى تۇڭعىش پرەزيدەنت.

تاعىلىمى تەرەڭ ماقالا بارىسىندا نۇرسۇلتان ءابىشۇلى ەگەمەندىكتىڭ تۋىن جەلبىرەتۋ بابالاردىڭ قانشاما عاسىردان بەرى اسقاق ارمانى بولعانىن، وعان جەتۋ جولىنداعى قيىندىقتار مەن تاريحقا قاسىرەتپەن تاڭبالانىپ جازىلعان زۇلمات جىلداردى كەلەشەك ۇرپاقتىڭ جادىنا سالدى.

«ازات ەلىمىزدىڭ جاستارى تاۋەلسىزدىككە بارار جولدىڭ قانداي ازاپتى بولعانىن، قانداي قۇرباندىقتار مەن سىناقتار – 1916 جىلعى ۇلت-ازاتتىق كوتەرىلىس، ازامات سوعىسى، اشارشىلىقتىڭ الاپات ەكى تولقىنى، قۋعىن-سۇرگىن مەن رەپرەسسيالار، ۇلى وتان سوعىسى، تىڭ يگەرۋ جىلدارىنداعى جاپپاي قونىس اۋدارۋدىڭ زاردابى ارقىلى جەتكەنىمىزدى ءبىلۋى كەرەك. مۇنىڭ ءوزى وتكەن تاريحتى قاستەرلەپ، ودان ساباق الۋ ءۇشىن قاجەت. مەنىڭ «تاۋەلسىزدىك – بابالار قانىمەن كەلگەن كيەلى قۇندىلىق» دەيتىنىم وسىدان» دەي وتىرىپ، «تاۋەلسىزدىك – اتا-بابالارىمىزدىڭ ازاتتىق جولىنداعى جان الىسىپ، جان بەرىسكەن سان عاسىرلىق كۇرەسىنىڭ زاڭدى جالعاسى، حالىقارالىق قۇجاتتارمەن بەكىتىلىپ، ماڭگىلىككە بەرىلگەن سىيى» دەپ، ويىن تۇيىندەدى.

وسى ورايدا تۇڭعىش پرەزيدەنت: «تاۋەلسىزدىك تە باقىت سياقتى، باعالاعان ادامنىڭ، ايالاعان قوعامنىڭ قولىنا تۇراقتايدى. حالقى تاتۋ، ەكونوميكاسى قۋاتتى، ساياسي جۇيەسى تۇراقتى، مارتەبەسى بيىك، ابىرويى اسقاق قازاقستاننىڭ بولاشاعى كەشەگىدەن كەمەل، بۇگىنگىدەن نۇرلى ەكەندىگىنە كامىل سەنەمىن» دەپ ايتقانداي، ەلىمىزدىڭ ەرتەڭىنە بەك سەنىممەن قارايتىنىمدى جەتكىزگىم كەلەدى.

نۇرعازى بۇحارباي،
شىمكەنت قالاسىنىڭ ءماسليحات دەپۋتاتى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket