Elimizdiń Tuńǵysh Prezıdenti – Elbasy Nursultan Nazarbaev Táýelsizdiktiń 30 jyldyq merekesi qarsańynda «Táýelsizdik taǵylymy» atty maqala jarııalady. Bul maqalada Elbasy óz halqyn aıtýly merekemen quttyqtaı otyryp, osy orda buzar otyz jyl ýaqyt aralyǵynda jas memleket Qazaqstannyń baǵyndyrǵan belesi men asqan asýy tolaǵaı ekenin tilge tıek etti.
«Men otyz jyl boıy halqymdy qanattyǵa qaqtyrmaı, tumsyqtyǵa shoqyttyrmaı, qaırańǵa qaldyrmaı, álemdik órkenıettiń aldyńǵy shebine, dúnıedegi eń damyǵan 40 eldiń qataryna qostym. Osy jyldar ishinde álemdik ǵylym men mádenıettiń eń úzdik jetistikterin meńgergen jańa urpaq qalyptasty» deı kele, «Yntymaǵy jarasqan eldiń tabysy tasyp, abyroıy asady. Berekesi qashqan eldiń qýaty kemip, quty qashady. Otyz jyl ishinde biz ǵasyrlarǵa bergisiz damý jolynan óttik», – dedi Tuńǵysh Prezıdent.
Taǵylymy tereń maqala barysynda Nursultan Ábishuly egemendiktiń Týyn jelbiretý babalardyń qanshama ǵasyrdan beri asqaq armany bolǵanyn, oǵan jetý jolyndaǵy qıyndyqtar men tarıhqa qasiretpen tańbalanyp jazylǵan zulmat jyldardy keleshek urpaqtyń jadyna saldy.
«Azat elimizdiń jastary táýelsizdikke barar joldyń qandaı azapty bolǵanyn, qandaı qurbandyqtar men synaqtar – 1916 jylǵy ult-azattyq kóterilis, azamat soǵysy, asharshylyqtyń alapat eki tolqyny, qýǵyn-súrgin men repressııalar, Uly Otan soǵysy, tyń ıgerý jyldaryndaǵy jappaı qonys aýdarýdyń zardaby arqyly jetkenimizdi bilýi kerek. Munyń ózi ótken tarıhty qasterlep, odan sabaq alý úshin qajet. Meniń «Táýelsizdik – babalar qanymen kelgen kıeli qundylyq» deıtinim osydan» deı otyryp, «Táýelsizdik – ata-babalarymyzdyń azattyq jolyndaǵy jan alysyp, jan berisken san ǵasyrlyq kúresiniń zańdy jalǵasy, halyqaralyq qujattarmen bekitilip, máńgilikke berilgen syıy» dep, oıyn túıindedi.
Osy oraıda Tuńǵysh Prezıdent: «Táýelsizdik te baqyt sııaqty, baǵalaǵan adamnyń, aıalaǵan qoǵamnyń qolyna turaqtaıdy. Halqy tatý, ekonomıkasy qýatty, saıası júıesi turaqty, mártebesi bıik, abyroıy asqaq Qazaqstannyń bolashaǵy keshegiden kemel, búgingiden nurly ekendigine kámil senemin» dep aıtqandaı, elimizdiń erteńine bek senimmen qaraıtynymdy jetkizgim keledi.
Nurǵazy BUHARBAI,
Shymkent qalasynyń máslıhat depýtaty
