ءانشى ساكەن مايعازيەۆ بۇگىنگى قازاق تەلەۆيزياسىنداعى ارزان شوۋ-باعدارلامالار مەن سولاردىڭ باسى قاسىندا جۇرگەن ارىپتەستەرىن سىنعا الدى. بۇل تۋرالى ءانشى اسحات سادىربايدىڭ «ۇلكەندەردىڭ اڭگىمەسى» اتتى ينتەرنەت-جوباسىنا بەرگەن سۇحباتىندا ايتتى.
«تۇركيادا جاعىمسىز باعدارلامانى جاپقىزىپ تاستاعان. سودان كەيىن ولار «كىم بار؟» دەپ تىمىسكىلەپ قازاقستانعا كەلدى. ءيا، ۇلكەن تانىمالدىلىققا يە باعدارلاما. سول قوسىلىپ جاتقان ەكى جاستىڭ ۇرپاقتارى ءۇشىن مەن جانىم اشىپ، شىرىلداپ جاتسام، مەنىڭ ارىپتەستەرىم سول باعدارلامانىڭ شاشباۋىن كوتەرىپ، سويىلىن سوعىپ ءجۇر. سوندا مەن كىم ءۇشىن زار قاقساپ ءجۇرمىن؟
مەن ونداي بەلدەن تومەن باعدارلامالارعا ءولىپ كەتسەم دە بارمايمىن.
سول ورايدا: “قازاق دەپ جۇرگەن ازامات قوي، ساكەننىڭ ءبىر اۋىز ءسوزى ءۇشىن وسى باعدارلاماعا بارماي-اق قويايىق، ءبىزدىڭ تانىمالدىلىعىمىز وسىدان كەمىپ قالمايدى” دەمەيدى. كەرىسىنشە ساعان قاس قىلعانداي قىلادى. وسى دۇرىس پا ەندى؟» – دەپ اشىندى ءانشى.
سونداي-اق، مايعازيەۆ اتالعان باعدارلاماعا قاتىسىپ، اۋزىنا كەلگەندى ايتىپ جۇرگەن قاراگوزدەر تۋرالى دا ءسوز ەتتى.
«وزدەرىنىڭ ۇرپاقتارىنا وزدەرى بالتا شاۋىپ جاتقان سياقتى. مەن سولاي عانا توپشىلايمىن. ولار قازىرگى تانىمالدىلىقتارىنا ماس بوپ جۇرگەن شىعار. ەرتەڭ ولاردىڭ بالالارى بولماي ما، قىزدارى دۇنيەگە كەلمەي ما؟ كورىنگەن تاۋدىڭ الىستىعى جوق. كوزدى اشىپ-جۇمعانشا بالالارى وسەدى. «مەنىڭ اكە-شەشەم وسىنداي بولىپتى، اۋزىنان اق يت كىرىپ، كوك يت شىعىپتى عوي» دەگەندە: «قىزىم، ول كەزدە تانىمال بولۋ ءۇشىن سويتكەنبىز»، – دەپ وتىرا ما سوندا؟
تانىمال بولدىڭ ال! كوپشىلىكتىڭ باتاسىن الىپ جاتسىڭ با، كوگەرىپ جاتسىڭ با، ءوسىپ جاتسىڭ با؟ بولاشاقپەن جۇمىسى جوق، بۇگىن تانىمال بولسام بولدى. بۇگىن قارنىمدى تويدىرىپ، ءبىر جەردەن تاماق ىشسەم بولدى دەگەن سياقتى يت تىرلىك. سونداي باعدارلامالار كوبەيىپ كەتتى. دوس بولىپ تا، جۇمساق تا، قاتتى دا ايتىپ جاتىرمىز. ساناسىزعا سان ايتساڭ دا، دارىمايدى دەگەن وسى بوپ تۇر»، – دەيدى مايعازيەۆ.
ءانشىنىڭ بۇل ايتقاندارىنان اڭگىمەنىڭ توركىنى اتىشۋلى «قالاۋلىم» باعدارلاماسى جايىندا ەكەنىن اڭعارۋ قيىن ەمەس.
بۇدان وزگە ساكەن مايعازيەۆ پەن اسحات سادىرباي ونەر ادامدارىنىڭ اراسىنداعى اۋىز بىرشىلىكتىڭ جوقتىعى، انشىلەرگە ايتىلاتىن حالىقتىڭ سىني-پىكىرلەرى، جەمقورلىق جانە بۇگىنگى قوعامداعى قازاقتىڭ بەينەسى مەن يمان جايلى ءسوز ءوربىتتى.
