Ánshi Sáken Maıǵazıev búgingi qazaq televızııasyndaǵy arzan shoý-baǵdarlamalar men solardyń basy qasynda júrgen áriptesterin synǵa aldy. Bul týraly ánshi Ashat Sadyrbaıdyń «Úlkenderdiń áńgimesi» atty ınternet-jobasyna bergen suhbatynda aıtty.
«Túrkııada jaǵymsyz baǵdarlamany japqyzyp tastaǵan. Sodan keıin olar «kim bar?» dep timiskilep Qazaqstanǵa keldi. Iá, úlken tanymaldylyqqa ıe baǵdarlama. Sol qosylyp jatqan eki jastyń urpaqtary úshin men janym ashyp, shyryldap jatsam, meniń áriptesterim sol baǵdarlamanyń shashbaýyn kóterip, soıylyn soǵyp júr. Sonda men kim úshin zar qaqsap júrmin?
Men ondaı belden tómen baǵdarlamalarǵa ólip ketsem de barmaımyn.
Sol oraıda: “Qazaq dep júrgen azamat qoı, Sákenniń bir aýyz sózi úshin osy baǵdarlamaǵa barmaı-aq qoıaıyq, bizdiń tanymaldylyǵymyz osydan kemip qalmaıdy” demeıdi. Kerisinshe saǵan qas qylǵandaı qylady. Osy durys pa endi?» – dep ashyndy ánshi.
Sondaı-aq, Maıǵazıev atalǵan baǵdarlamaǵa qatysyp, aýzyna kelgendi aıtyp júrgen qaragózder týraly da sóz etti.
«Ózderiniń urpaqtaryna ózderi balta shaýyp jatqan sııaqty. Men solaı ǵana topshylaımyn. Olar qazirgi tanymaldylyqtaryna mas bop júrgen shyǵar. Erteń olardyń balalary bolmaı ma, qyzdary dúnıege kelmeı ma? Kóringen taýdyń alystyǵy joq. Kózdi ashyp-jumǵansha balalary ósedi. «Meniń áke-sheshem osyndaı bolypty, aýzynan aq ıt kirip, kók ıt shyǵypty ǵoı» degende: «Qyzym, ol kezde tanymal bolý úshin sóıtkenbiz», – dep otyra ma sonda?
Tanymal boldyń al! Kópshiliktiń batasyn alyp jatsyń ba, kógerip jatsyń ba, ósip jatsyń ba? Bolashaqpen jumysy joq, búgin tanymal bolsam boldy. Búgin qarnymdy toıdyryp, bir jerden tamaq ishsem boldy degen sııaqty ıt tirlik. Sondaı baǵdarlamalar kóbeıip ketti. Dos bolyp ta, jumsaq ta, qatty da aıtyp jatyrmyz. Sanasyzǵa san aıtsań da, darymaıdy degen osy bop tur», – deıdi Maıǵazıev.
Ánshiniń bul aıtqandarynan áńgimeniń tórkini atyshýly «Qalaýlym» baǵdarlamasy jaıynda ekenin ańǵarý qıyn emes.
Budan ózge Sáken Maıǵazıev pen Ashat Sadyrbaı óner adamdarynyń arasyndaǵy aýyz birshiliktiń joqtyǵy, ánshilerge aıtylatyn halyqtyń synı-pikirleri, jemqorlyq jáne búgingi qoǵamdaǵy qazaqtyń beınesi men ıman jaıly sóz órbitti.
