شىمكەنتتەگى زەينەتكەرلەردى ساۋىقتىرۋعا ارنالعان «اسىل جۇرەك» ورتالىعى 2019 جىلدىڭ ناۋرىز ايىندا اشىلعان. مۇندا كۇنىنە 4 ساعات اقىسىز جارتىلاي ستاتسيونارلىق جاعدايىندا مەديتسينالىق جانە ارناۋلى الەۋمەتتىك قىزمەتتەر كورسەتىلەدى. ورتالىق ەكى اۋىسىمدا جۇمىس جاساپ، ءبىر اۋىسىمدا 30 ادامعا دەيىن قىزمەت كورسەتەدى. بۇگىندە كارانتين تالاپتارى بويىنشا كۇندىزگى ستاتسيوناردا 65 جاسقا دەيىنگى زەينەتكەرلەردى قابىلداپ وتىر.
- ورتالىقتىڭ كۇن ءتارتىبى زەينەتكەرلەردى دارىگەرلىك تەكسەرۋدەن باستالادى. قارتتارعا جوعارى ساناتتى كارديولوگ، تەراپەۆت، نەۆروپاتولوگ جانە فيزيوتەراپەۆت دارىگەرلەرى قىزمەت كورسەتەدى. جۋىردا مەكەمەدە فيزيوتەراپيا كابينەتى اشىلىپ، كوپفۋنكتسيونالدى «پوليماگ» قوندىرعىسى ىسكە قوسىلىپ، كوپتەگەن سىرقاتتارعا ەمدىك قاسيەتى بار قۇرىلعى كوروناۆيرۋس پەن پنەۆمونيادان كەيىنگى اسقىنۋلارمەن كۇرەستە كومەگى وراسان. مەكەمەدە قاريالاردىڭ ەمدىك ماسساج قابىلداپ، پسيحولوگيالىق ترەنينگتەر، سپورتپەن شۇعىلدانۋىنا بارلىق مۇمكىندىك جاسالعان. سونداي-اق، ورتالىق قىزمەتكەرلەرىنىڭ بىلىكتىلىگىن ارتتىرۋعا دا ەرەكشە كوڭىل بولىنگەن. دەمالۋشى قاريالار اپتاسىنا 2 كۇن سۋدا ءجۇزىپ، دەندروساياباققا سەرۋەنگە شىعادى-دەيدى ورتالىق ديرەكتورى ماۋيا الدانازاروۆا.
ورتالىقتا جىل باسىنان بەرى 120 زەينەتكەر 1 اي كولەمىندە ارناۋلى الەۋمەتتىك قىزمەت الدى (جىلدىق كولەمى – 740 ادام). الداعى ۋاقىتتا ورتالىقتىڭ قالا اۋداندارىندا بولىمشەلەرىن اشۋ جوسپارلانۋدا.
اتالعان ورتالىققا كەلۋ ءۇشىن جەكە كاۋلىك پەن زەينەت كىتاپشاسىنىڭ كوشىرمەسى، مەديتسينالىق كارتانى تولتىرىپ، حقكو ارقىلى ءوتىنىم بەرەدى. ءوتىنىم نەگىزىندە جولداما قالالىق جۇمىسپەن قامتۋ جانە الەۋمەتتىك قورعاۋ باسقارماسى تاراپىنان بەرىلەدى.
جالپى، شىمكەنت قالاسى بويىنشا زەينەتكەرلەر سانى – 82 821, سونىڭ ىشىندە ۇوس ارداگەرلەر سانى – 20, تىل ەڭبەككەرلەرى – 3153. كوپ بالالى انالار سانى – 43 932, ونىڭ ىشىندە «التىن القا»، «كۇمىس القا» بەلگىلەرىمەن ماراپاتتالعاندار – 10 667, زەينەت جاسىنداعى كوپ بالالى انالار – 2 377.
