ەلباسى جەتەكشىلىگىمەن قازاقستاندا زاماناۋي يندۋستريالىق ساياسات قالىپتاستى

1205
Adyrna.kz Telegram

ەلباسى مەملەكەت دامۋىنىڭ ستراتەگيالىق باسىمدىقتارىن بەكىتتى. ونىڭ ىشىندە نۇرسۇلتان نازارباەۆتىڭ جەتەكشىلىگىمەن قازاقستاندا زاماناۋي يندۋستريالىق ساياسات قالىپتاستى. بۇگىن «تۇركىستان» سارايىندا تۇڭعىش پرەزيدەنت كۇنىنە وراي وتكەن مەرەكەلىك شارادا سويلەگەن سوزىندە قالا اكىمى مۇرات ايتەنوۆ وسىلاي دەدى.

«تاۋەلسىزدىك داۋىرىندە قازاقستان تولاعاي تابىستارعا قول جەتكىزدى. ونىڭ ءبىر قاتارىنا توقتالار بولسام، نۇرسۇلتان نازارباەۆتىڭ جەتەكشىلىگىمەن قازاقستاندا زاماناۋي يندۋستريالىق ساياسات قالىپتاستى. سوڭعى جىلداردىڭ وزىندە ەلىمىزدە 1500-دەن استام جاڭا ءوندىرىس ىسكە قوسىلىپ، 700 جاڭا ءونىم تۇرلەرىن شىعارۋ جولعا قويىلدى. قازاقستاندا شىعارىلعان تۋارلار الەمنىڭ 110 ەلىنە ەكسپورتتالۋدا. 2009 جىلدان باستاپ وڭدەۋ سەكتورىنداعى ءوندىرىس كولەمى 3 ەسەگە ۇلعايدى»،-دەدى قالا باسشىسى.

مۇرات ايتەنوۆ ءوز سوزىندە ەلىمىز ەۋرازيالىق كەڭىستىكتەگى ءىرى ترانزيتتىك حابقا اينالىپ، 2 700 شاقىرىمنان اساتىن باتىس ەۋروپا-باتىس قىتاي كولىك ءدالىزىنىڭ قازاقستاندىق ۋچاسكەسى اشىلعانىن ايتتى. سونىمەن بىرگە تەمىر جول جانە اۆتوموبيل ماگيسترالدارى جەلىسى كىرەتىن ترانس-كاسپي ءدالىزى قۇرىلعانىن، وسى جىلداردا 15 مىڭ شاقىرىمعا جۋىق اۆتوموبيل جولدارى، 4 مىڭ شاقىرىمدى قۇرايتىن تەمىر جولدار سالىنىپ، ەلدەگى 16 اۋەجاي قايتا جاڭارتىلعانىن جانە 4 اۋەجاي جاڭادان سالىنعانىن ءمالىم ەتتى.

شىمكەنت قالاسى اكىمدىگىنىڭ ءباسپاسوز قىزمەتى

پىكىرلەر