قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي، شىمكەنت قالالىق دەنساۋلىق ساقتاۋ باسقارماسى «دەنى ساۋدىڭ جانى ساۋ!» تاقىرىبىندا دەنساۋلىق كۇنى اكتسياسىن وتكىزدى. اتالعان اكتسيا اياسىندا قالالىق ەمحانالاردىڭ بەيىندى ماماندارى «شىمكەنت-پلازا»، «مەگا-پلانەت»، «سەۆەر» سياقتى ءىرى ساۋدا ورتالىقتارىندا ساتۋشىلار مەن قالا تۇرعىندارىن تەگىن قابىلداپ، مەديتسينالىق كومەك كورسەتتى.
«پاندەميا كەزىندە وسىنداي دەنساۋلىق اكتسيالارىن ۇيىمداستىرۋ وتە ماڭىزدى. مۇنداعى ءبىر ەرەكشەلىك، كەلۋشىلەردى بەيىندى مەديتسينا قىزمەتكەرىنىڭ قابىلداۋىنا الدىن الا جازىلۋعا مىندەتتەمەيدى»،- دەدى، قالانىڭ ادام كوپ جينالاتىن ساۋدا ورتالىقتارىنىڭ بىرىنە ارنايى كەلگەن №1 ەمحانانىڭ باس دارىگەرى م.بەيسەۋوۆ.
ساۋدا ورتالىعىندا جۇمىس ىستەيتىن ەدىل اقباەۆ: «كوبىنە جۇمىستان قول بوساماي دەنساۋلىعىمىزعا كوڭىل بولمەي كەتەتىنىمىز راس. الدىمىزعا دارىگەرلەردىڭ ءوزى ىزدەپ كەلىپ تۇرعاندا، مۇنداي مۇكىندىكتى جىبەرمەيىن دەپ كارديولوگ پەن وكۋليستتىڭ كەڭەسىن الدىم. كوزىم مەن جۇرەگىم مازالايتىن. ەمحانالارعا بارساڭ كەزەك كوپ بولادى. الدىن الا جازىلۋ ارقىلى قابىلدايدى. بۇل جەردە ىزدەگەن دارىگەرلەرىمنىڭ كەلگەنىنە قۋناىپ تۇرمىن. قولىما رەتسەپت جازىپ بەردى. ەندى ەم قابىلداپ، دەنساۋلىعىمىزعا دا قارايمىز. وسىنداي اكتسيالار ءجيى بولىپ تۇرسا، حالىق ءۇشىن پايدالى عوي، - دەپ ءوز ويىمەن ءبولىسىپ، دارىگەرلەرگە العىسىن ءبىلدىردى.
سونىمەن قاتار، «دەنى ساۋدىڭ – جانى ساۋ!» اكتسياسى اياسىندا قالانىڭ شالعاي اۋداندارىندا دا بەيىندى مامانداردىڭ تەكسەرۋى وتۋدە. اتاپ ايتقاندا، №11 قالالىق ەمحاناسىنا قاراستى «اقتاس» دارىگەرلىك امبۋلاتورياسىندا №10 قالالىق ەمحاناسىنا قاراستى «قاينار» فاپ-دە، №12 قالالىق ەمحاناسىنا قاراستى «شاپىراشتى» دارىگەرلىك امبۋلاتورياسىندا، №7 قالالىق ەمحاناسىنا قاراستى «توعىس» دارىگەرلىك امبۋلاتورياسىندا حالىققا مەديتسينالىق كومەك كورسەتۋدە.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
