ەل تاۋەلسىزدىگىنىڭ 30 جىلدىعىنا وراي قالا اكىمى م.ايتەنوۆ بەكىتكەن «30 جۇلدىزدى كۇن» ءىس-شارلار جوسپارىنا سايكەس، شىمكەنتتە قالالىق حالىقتى جۇمىسپەن قامتۋ ورتالىعى مەن قالالىق «جاستار رەسۋرستىق ورتالىعى» بىرلەسە جۇمىسسىز تۇرعىندارعا ارنالعان كوشپەلى بوس جۇمىس ورىندارى جارمەڭكەسىن ۇيىمداستىرىپ وتكىزدى.
«شاڭىراق» وتباسى ينستيتۋتىن قولداۋ ورتالىعىندا وتكەن جارمەڭكەدە ءتۇرلى مەكەمەلەر مەن كاسىپورىندار تاراپىنان 700-گە جۋىق تەحنيكالىق، پەداگوگيكالىق جانە ت.ب. سالالار بويىنشا تۇراقتى بوس جۇمىس ورىندارى ۇسىنىلدى.
سونىمەن قاتار، ءىس-شارا بارىسىندا كەلۋشىلەردى جۇمىسپەن قامتۋ ورتالىعىنىڭ ماماندارى «ەڭبەك» مەملەكەتتىك باعدارلاماسىنىڭ تيىمدىلىگى مەن جۇمىسپەن قامتۋ شارالارىنا قاتىسۋ مۇمكىندىكتەرىن ءتۇسىندىرىپ، اقپاراتتاندىردى.
قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ب.ناربەكوۆا حانىم بۇگىنگى جارمەڭكەدە بىرقاتار ازاماتتار ناتيجەلى ءارى تۇراقتى جۇمىسپەن قامتىلعاندىعىن جانە دە جۇمىس بەرۋشى مەكەمەلەردىڭ سۇرانىسىنا ساي قاجەتتى مامان تاڭداۋلارىنا مۇمكىندىك بەرىلگەندىگىن ايتا كەلە، بۇگىنگى تاڭدا «الەم بت»، «Azala Textile»، «گاۋحار تىگىن فابريكاسى»، «Alliance» جشس، «PetroKazakhstan» سىندى ءىرى كاسىپورىندارعا ينجەنەر، ديسپەچتەر، تىگىنشى، مەحانيك، دانەكەرلەۋشى جانە ت.ب. تەحنيكالىق ماماندىقتار قاجەت ەكەنىن اتاپ ءوتتى.
جالپى جىل باسىنان بەرى «ەڭبەك» مەملەكەتتىك باعدارلاماسى بويىنشا 28 286 ادامدى جۇمىسقا ورنالاستىرۋ جوسپارلانسا، بۇگىنگى تاڭعا دەيىن 26 013 ادام قالاداعى ءتۇرلى كاسىپورىندار مەن مەكەمەلەرگە جۇمىسقا جولدانىپ وتىر.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
