مەموراندۋم اياسىندا جاستار «ەڭبەك» مەملەكەتتىك باعدارلاماسىنىڭ «جاستار پراكتيكاسى»، «الەۋمەتتىك جۇمىس ورىندارى» جانە «العاشقى جۇمىس ورنى» باعىتتارى بويىنشا مەتالدار مەن قورىتپالاردى ساتۋمەن، قارا مەتالداردىڭ قالدىقتارى مەن سىنىقتارىن قايتا وڭدەۋمەن جانە ءتۇستى مەتالداردىڭ سىنىقتارى مەن قالدىقتارىن كوتەرمە ساۋدادا ساتۋمەن اينالىساتىن كاسىپورىندارعا جولداناتىن بولادى. سونىمەن قاتار، م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ تەحنيكالىق ماماندىق تۇلەكتەرىن تۇراقتى جۇمىسقا جانە «جاستار پراكتيكاسى»، «العاشقى جۇمىس ورنى»، «الەۋمەتتىك جۇمىس ورىندارى» باعىتتارى بويىنشا مەملەكەت ەسەبىنەن اقىلى ۋاقىتشا جۇمىسقا الاتىن بولىپ كەلىسىلدى. بيىلعى جىلى «ەڭبەك» مەملەكەتتىك باعدارلاماسى بويىنشا 28 286 ادامدى جۇمىسقا ورنالاستىرۋ جوسپارلانعان. ونىڭ ىشىندەگى 26 013 ادام بۇگىنگى تاڭدا جۇمىسپەن قامتىلىپ وتىر. اتاپ ايتقاندا، 2 578 ادام جاستار پراكتيكاسىمەن، 347 ادام الەۋمەتتىك جۇمىس ورىندارىمەن قامتىلسا، 118 ادام «العاشقى جۇمىس ورىندارى» جوباسى اياسىندا قالاداعى ءتۇرلى كاسىپورىندار مەن مەكەمەلەرگە جۇمىسقا ورنالاسقان.
شىمكەنت قالاسىنىڭ اقپاراتتىق - كوممۋنيكاتسيالىق ورتالىعى
