تاۋەلسىزدىكتىڭ 30 جىلىندا قازاقستاننىڭ قول جەتكىزگەن بارلىق جەتىستىكتەرى مەن جەڭىستەرىنىڭ نەگىزىندە حالىقتىڭ ىنتىماق-بىرلىگى جاتقانى تالاسسىز. ەتنوسارالىق تاتۋلىق پەن كونفەسسياارالىق كەلىسىم، ازاماتتاردىڭ زاڭ الدىنداعى تەڭدىگى مەن تولەرانتتىلىق — قازاقستاندىق قوعامنىڭ ەڭ قاستەرلى قۇندىلىقتارى بولىپ وتىر. وسىناۋ قۇندىلىقتاردى قوعامدىق ساناعا ورنىقتىرا ءتۇسىپ، ەلدىڭ ىشكى بىرلىگى مەن ساياسي تۇراقتىلىقتى نىعايتا تۇسۋدە ەلباسى نۇرسۇلتان نازارباەۆتىڭ باستاماسىمەن قۇرىلعان قازاقستان حالقى اسسامبلەياسىنىڭ ماڭىزدى ءرول اتقارىپ كەلە جاتقانى بەلگىلى.
بۇگىندە شىمكەنت قالالىق قازاقستان حالقى اسسامبلەياسىنىڭ قۇرامىندا 17 ەتنومادەني بىرلەستىك بەلسەندى تۇردە جۇمىس ىستەۋدە. بۇل مەگاپوليستە بارلىق ەتنوس وكىلدەرىنىڭ ۇلتتىق ەرەكشەلىكتەرىن، ءتىلى مەن مادەنيەتىن ساقتاۋىنا بارىنشا جاعداي جاسالعانىن كورسەتەدى.
سوڭعى جىلدارى قحا ءوز قىزمەتىنىڭ اۋقىمىن كەڭەيتىپ، مازمۇنىن بايىتىپ كەلە جاتقانى بەلگىلى. ەندىگى جەردە اسسامبلەيا تەك مادەني ءىس-شارالار وتكىزۋمەن شەكتەلمەي، قازاقستان حالقىن ازاماتتىق نەگىزدەگى ءبىرتۇتاس ۇلتقا اينالدىرۋ، ۇلتتىق بىرلىكتى بەكەمدەۋ، جاڭا قازاقستاندىق ءپاتريوتيزمدى ناسيحاتتاۋ جانە قايىرىمدىلىق ءىس-شارالاردى ۇيلەستىرۋ سەكىلدى ماڭىزدى فۋنكتسيالاردى اتقارىپ كەلەدى. ول ءۇشىن شىمكەنت قالالىق قازاقستان حالقى اسسامبلەياسى جانىنان ءتۇرلى قوعامدىق نەگىزدەگى قۇرىلىمدار، اتاپ ايتقاندا، قوعامدىق كەلىسىم كەڭەسى، انالار كەڭەسى جانە مەدياتسيا كەڭەسى، «جاڭعىرۋ جولى» جاستار قوزعالىسى، عىلىمي-ساراپشىلىق توپ جانە جۋرناليستەر مەن بلوگەرلەر كلۋبى جۇمىس ىستەۋدە.
جاقىندا اسسامبلەيانىڭ جۇمىسىن جەتىلدىرە تۇسۋگە سەپتىگىن تيگىزەتىن تاعى دا ءبىر جاڭالىق بولدى. ناقتى ايتار بولساق، شاھارداعى «قازاقستان حالقى اسسامبلەياسى» عيماراتى تۇركىستان وبلىسىنان شىمكەنت قالاسىنىڭ قاراۋىنا ءوتىپ، «قوعامدىق كەلىسىم» كوممۋنالدىق مەملەكەتتىك مەكەمەسىنىڭ تەڭگەرىمىنە بەرىلدى. ايتا كەتەيىك، «قوعامدىق كەلىسىم» مەكەمەسى – قحا-نىڭ جۇمىسشى ورگانى.
كوپشىلىكتىڭ ەسىندە بولسا، بۇل عيماراتتى 2017 جىلعى 27 ساۋىردە شىمكەنت قالاسىنا جاساعان جۇمىس ساپارى اياسىندا ەلباسى ن.نازارباەۆتىڭ ءوزى اشقان بولاتىن. عيماراتتىڭ الدىنداعى «قازاق ەلىنە مىڭ العىس!» مونۋمەنتىن سوناۋ سوعىس جانە دەپورتاتسيا جىلدارىندا تاعدىردىڭ ايداۋىمەن قازاق جەرىنە كەلگەن وزگە ەتنوس وكىلدەرىن جاتسىنباي باۋىرىنا باسىپ، قامقورلىق كورسەتكەن مەملەكەت قۇراۋشى قازاق حالقىنا العىس رەتىندە وڭىردەگى ەتنوس وكىلدەرى ورناتقان.
ايتا كەتەيىك، ءتورت قاباتتان تۇراتىن عيماراتتىڭ جالپى كولەمى 4 454 شارشى مەتردى قۇرايدى. وندا جۇمىس كابينەتتەرى، ەتنومادەني بىرلەستىكتەردىڭ كەڭسەلەرى ورنالاسقان. مۇندا اسسامبلەيانىڭ ءتيىمدى قىزمەت اتقارۋىنا قاجەتتى جاقسى ماتەريالدىق-تەحنيكالىق بازا بار. 800 ورىندىق كونتسەرت زالى، زاماناۋي ستۋديا، كيىم بولمەلەرى، دايىندىق زالدار بار.
سونىمەن قاتار، قازىر عيماراتتىڭ تومەنگى قاباتىندا ءتۇرلى ەتنوستاردىڭ بي ۇيىرمەلەرىنە ارنالعان حورەوگرافيا زالى جانە حور ۇيىرمەسى، كوركەمونەرپازدار ۇيىمى جانە ءتىل مەكتەبىنە ارنالعان كابينەتتەر جاساقتالۋدا. بۇل ءوز كەزەگىندە ەتنوستاردىڭ ءتىلى مەن مادەنيەتىن، سالت-داستۇرلەرى مەن ادەت-عۇرىپتارىن ساقتاۋىنا مۇمكىندىك بەرەدى
بۇگىندە قالاداعى اسەم عيماراتتاردىڭ قاتارىنداعى «قازاقستان حالقى اسسامبلەياسى» عيماراتى قالا تۇرعىندارىنىڭ كوز-قۋانىشىنا اينالعان دەۋگە بولادى. قىزىعۋشىلىق تانىتقان كەز كەلگەن ازامات دوستىق ۇيىنە كەلىپ، اسسامبلەيا قىزمەتى، قالا ەتنوستارىنىڭ مادەنيەتى مەن سالت-داستۇرلەرى تۋرالى مالىمەت الۋىنا بولادى.
جالپى، 2021 جىلدىڭ 9 ايىندا قحا سانيتارلىق تالاپتاردى ساقتاي وتىرىپ 186 ءىس-شارا وتكىزدى. الداعى ۋاقىتتا اسسامبلەيا عيماراتىندا مازمۇندى ءارى ءماندى ىستەر كوپتەپ اتقارىلىپ، بۇل عيمارات شىمكەنت قالاسىنداعى ءتۇرلى ەتنوس وكىلدەرى اراسىنداعى ديالوگ الاڭىنا جانە دوستىقتىڭ التىن شاڭىراعىنا اينالادى دەپ سەنەمىز.
ەربول بايقوناقوۆ،
شىمكەنت قالاسىنىڭ ىشكى
ساياسات جانە جاستار ىستەرى
جونىندەگى باسقارماسى
«قوعامدىق كەلىسىم»
كمم-ءنىڭ باسشىسى.
