بۇگىن — كەڭەستىك جانە قازاق كينو جانە تەاتر اكتەرى، قازاق تەاترىنىڭ مەترى اتانعان دارىندى ارتيست، قازاقستاننىڭ حالىق ءارتىسى، تاۋەلسىز «پلاتيندى باس تارلان» سىيلىعىنىڭ جانە قازاق ۇلتتىق كينواكادەمياسىنىڭ «قۇلاگەر» سىيلىعىنىڭ يەگەرى، تەاتر جانە كينو ونەرىندە وزىندىك قولتاڭباسىن قالدىرعان اكتەر قاسىم جاكىباەۆتىڭ تۋعان كۇنى.
قاسىم ابەكۇلى جاكىباەۆ 1929 جىلى 12 جەلتوقساندا الماتى وبلىسى، جامبىل اۋدانى، شولاققورعان اۋىلىندا دۇنيەگە كەلگەن. اكەسى سوعىسقا كەتكەن، قاسىم قازىرگى پانفيلوۆ پاركىندە ورنالاسقان «كراسنايا زۆەزدا» ارتەلىندە جۇمىسشى بولدى. 15 جاسىندا اكەسى ابەك ۇلى وتان سوعىسىندا قازا تابادى. اكە ولىمىنەن سوڭ، كوپ ۇزاماي اناسى سارقىت تا مارقۇم بولادى. ءومىردىڭ قيىن-قىستاۋ كەزدەرىن، اۋىرتپاشىلىعىن ەرتە كورگەن قاسىم 1944 جىلى الماتىداعى تەاتر جانە كوركەمسۋرەت ۋچيليششەسىنە ءتۇسىپ، 1948 جىلى ونى ءبىتىرىپ شىعادى. سول كەزدە حالىق ءارتىسى ياكوۆ ۆيكتور يۆانوۆيچ پەن قازاق ونەرىنىڭ مايتالمانى ءمانتاي سىزدىقوۆتان ءدارىس العان.
تۋما دارىن تەاتر ساحناسىندا ءجۇرىپ 300-دەن اسا ءرولدى سومدايدى. سونىڭ ىشىندە پولوني (ۆ.شەكسپيردىڭ «گاملەتىندە»), ۆۋرلە (ف.شيللەردىڭ «زۇلىمدىق پەن ماحابباتىندا»), قايراقباي (س.مۇقانوۆتىڭ «ءمولدىر ماحابباتىندا»), بۇكىر (س.بودىقوۆتىڭ «وتىرار ەرتەڭ قيرايدىسىندا»), توقاي (ع.مۇسىرەپوۆ پەن ق.ىسقاقتىڭ «ۇلپان ەنيسەيىندە»), شىڭعىس حان (ش.ايتماتوۆ پەن م.شاحانوۆتىڭ «ميعۇلا تەرىسى ۇستىندەگى سوتىندا»), قونقاي (ع.مۇسىرەپوۆتىڭ «اقان سەرى – اقتوق-تىسىندا»), الىبەك (ش.ايتماتوۆتىڭ «ارمانىم، اسەلىمىندە») ت.ب. قاسىم جاكىباەۆ–ويناقتاعان جەتى جاسار بالادان، قارتايعان جەتپىستەگى شالعا دەيىنگى رولدەردى سومداپ، قازاق تەاتر تاريحىندا وزىندىك قولتاڭباسىن قالدىرا بىلگەن دارىندى تۇلعا.
ول كينو سالاسىنا دا ەلەۋلى ۇلەس قوسقان تانىمال اكتەر. ونىڭ «دەرسۋ ۋزالا»، «جانسەبىل»، «قان مەن تەر»، «ۇشەۋ»، «ماحاببات ستانتسياسى»، «توعىسقان تاعدىرلار» فيلمدەرىندەگى رولدەرى — كينو ونەرى تاريحىندا قالدى.
