ء"ال-فارابي اتىنداعى قالالىق عىلىمي امبەباپ كىتاپحاناسىندا" شاھاردىڭ قۇرمەتتى ازاماتتارىنىڭ قاتىسۋىمەن "شىمكەنت قالاسىنىڭ قۇرمەتتى ازاماتتارى" جيناعىنىڭ تۇساۋكەسەرى ءوتتى. ەڭبەك ارداگەرى شەرىم مەدەۋوۆپەن بىرگە سالتاناتتى ءىس-شارادا جيناقتىڭ "قىزىل لەنتاسىن" قيعان قالا اكىمىنىڭ ءبىرىنشى ورىنباسارى شىڭعىس مۇقان شاھار باسشىسى اتىنان قۇرمەتتى ازاماتتاردى قۇتتىقتاپ، كىتاپتىڭ كەلەشەك ۇرپاققا مول مۇرا بولىپ قالاتىنىن ءسوز ەتتى.
- بيىل تاۋەلسىزدىگىمىزگە 30 جىل تولىپ وتىر. وسى كەزەڭ اياسىندا ەلىمىز ەكونوميكالىق ساياسي كوپتەگەن بەلەستەردى باعىندىردى. سونىمەن بىرگە رەسپۋبليكالىق مارتەبەگە يە بولعان شىمكەنت دەربەس مەگاپوليس رەتىندە ءوزىنىڭ سارا جولىن باستادى. وسىدان ونىڭ تاريحىن، مادەنيەتىن سارالايتىن ۋاقىت كەلىپ جەتتى. كىتاپتىڭ جارىققا شىعۋى دا تاۋەلسىزدىك تۇسىنداعى رۋحانياتىمىزدىڭ تۇگەندەلە باستاۋىنىڭ ءبىر بەلگىسى. جيناققا 1967 جىلدان بۇگىنگى كۇنگە دەيىن قۇرمەتتى ازامات اتاعىن العان كىسىلەر ەندى. ەلگە، ءتىپتى رەسپۋبليكاعا تانىمال ءتۇرلى سالا بويىنشا 145 قايراتكەردىڭ ءومىربايانى جاريالاندى. قالا رۋحانياتىن بايىتۋعا باعىتتالعان يگى قادامدار بۇدان كەيىن دە جالعاسىن تابادى، - دەدى شىڭعىس جۇمابەكۇلى.
شىمكەنت - قازاقتاننىڭ وڭتۇستىك قاقپاسى. مەگاپوليستىڭ ءوسىپ-وركەندەۋىنە ۇلكەن ۇلەس قوسقان ەڭبەك ارداگەرلەرى. قالانىڭ ءاربىر كىرپىشى سولاردىڭ قولىمەن قالانعانىن ايتقان ارداگەر ەركىن ساتقانباەۆ قۇرمەتتى ازاماتتارعا دەنساۋلىق پەن جەمىستى ەڭبەك تىلەدى.
تالاي شاكىرت تاربيەلەپ، قازاقتىڭ كوك بايراعىن بيىككە كوتەرىپ جۇرگەن تانىمال تۇلعا ەلدىڭ ۇزدىك باپكەرى مىرزاعالي ايتجانوۆ تا ءوزىنىڭ جۇرەكجاردى لەبىزىن جەتكىزدى.
سونداي-اق ونلاين ارقىلى بايلانىسقان قالامىزدىڭ قۇرمەتتى ازاماتتارى بەلگىلى اقىن مۇحتار شاحانوۆ پەن مەملەكەت قايراتكەرى امالبەك تشانوۆ جيناقتىڭ جارىققا شىعۋىمەن قۇتتىقتاپ، شىمكەتتىڭ شارىقتاپ دامۋىنا تىلەكتەرىن ءبىلدىردى.
ال قازاقتىڭ اقىن قىزى ءحانبيبى ەسەنقاراقىزى جىلى لەبىزىمەن قوسا قالاداعى ارداگەرلەر اللەياسىنا بايلانىستى ءوز ۇسىنىسىن جەتكىزدى.
ءىس-شارا سوڭىندا قالانىڭ قۇرمەتتى ازاماتتارى بارلىعى بىرگە ەستەلىككە سۋرەتكە ءتۇستى.
"شىمكەنت قالاسىنىڭ قۇرمەتتى ازاماتتارى" جيناعى 1 مىڭ دانا تيراجبەن باسىلىپ شىقتى. كىتاپ مەگاپوليستەگى جوعارى وقۋ ورىندارى مەن كىتاپحانالارعا تاراتىلادى. جيناق قالانىڭ دامۋىنا ەڭبەك سىڭىرگەن ازاماتتار ومىرىنەن سىر شەرتەتىن ناعىز ەنتسيكلوپەديا. ول بارىنەن بۇرىن تاريحتان تاعىلىم الار ەرتەڭگى ۇرپاق ءۇشىن قاجەت.
ءانۋار جۇماشباەۆ
