ءۇشىنشى مەگاپوليستىڭ باس سانيتارلىق دارىگەرى ءابدىماناپ تولەباەۆ كوروناۆيرۋسقا قارسى ۆاكتسينانىڭ III كومپونەنتىن سالدىرىپ، رەۆاكتسيناتسيالاۋ ناۋقانىن باستادى. قالالىق №13 ەمحانادا ورنالاسقان ەكپە ەگۋ پۋنكتىندە ۆەكتورلى ەكپە العانىنا 9 اي جانە بەلسەندى ەمەس ۆاكتسينا سالدىرعانىنا 6 اي بولعان تۇرعىندار قايتا ۆاكتسيناتسيالاۋدان ءوتتى.
– Covid-19 ينفەكتسياسىنىڭ الدىن الۋ ماقساتىندا قايتا ۆاكتسينا سالدىرۋعا كەلىپ، وتاندىق ءونىم «QazVak» ەكپەسىن الدىم. اقپان ايىندا رەسەيلىك ۆەكتورلى «Sputnik-v» ۆاكتسيناسىن العانىما 9 اي تولعان سوڭ كەلىپ تۇرمىن. كوروناۆيرۋسقا قارسى ەكپەنىڭ العاشقى جانە ەكىنشى كومپونەنتتەرىن سالدىرعاننان كەيىن جازعى تولقىندا، ءتۇرلى دەڭگەيدەگى اۋرۋ-سىرقاتتىڭ ورتاسىندا جۇردىك. اۋرۋدان امان قالعانىمىزعا دا سەبەپشى ەكپە دەپ بىلەمىن. رەۆاكتسيناتسياعا مەديتسينا قىزمەتكەرلەرى مەن پەداگوگتەر، كۇش قۇرىلىمىنداعى ماماندار، ءتۇرلى الەۋمەتتىك دەڭگەيلى وسال توپتاعى ازاماتتار وتەدى. قازىر قالامىزداعى ەكپە ەگۋ پۋكنتتەرىندە ۆاكتسينانىڭ 6 ءتۇرى سالىنۋدا. ودان بولەك، جاسوسپىرىمدەر مەن جۇكتى جانە بالا ەمىزەتىن ايەلدەردى ۆاكتسيناتسيالاۋ جۇمىستارى ءجۇرىپ جاتىر. بۇگىنگى تاڭعا 1700-دەن استام ادام «كوميرناتي» (Pfizer) ەكپەسىن الدى. ولاردىڭ ىشىندە ىندەتتى جۇقتىرعاندار مەن دەنساۋلىعىنا شاعىم ايتقاندار بولمادى. شىمكەنتتە ەپيداحۋال قالىپتى. قالامىز جاسىل ايماقتا. بىراق سانيتارلىق تالاپتار تولىق ساقتالۋى كەرەك. بەتپەردەلىك رەجيم، اراقاشىقتىق جانە «Ashyq» قوسىمشاسىن قولدانۋ ءالى دە جالعاسادى. ادامدار زاڭنان قورقىپ ەمەس، ءوز دەنساۋلىعى ءۇشىن كۇرەسۋى كەرەك. ول ءۇشىن ەكپەنىڭ بارلىق كومپونەنتىن سالۋدىرۋعا شاقىرامىن، - دەدى باس سانيتار دارىگەر.
ال ەمحانانىڭ ەپيدەميولوگ دارىگەرى اقبوپە سارسەنبەكوۆا اتالعان ەكپە ەگۋ پۋنكتىندە اقپان ايىنان بەرى كوروناۆيرۋسقا قارسى 24 مىڭ ادام ۆاكتسينا العانىن ايتادى. الداعى ۋاقىتتا ۆەكتورلى ەكپە العانىنا 9 اي جانە بەلسەندى ەمەس ۆاكتسينا سالدىرعانىنا 6 اي بولعان تۇرعىندار رەۆاكتسيناتسيالاۋعا كەلۋىنە بولادى.
ازامات جاپپار
