قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا ۇلتتىق قاۋىپسىزدىك كوميتەتى «مەملەكەتتىك شەكارا» كىتابىن شىعاردى. جاڭا كىتاپ مەملەكەتتىك شەكارانى كۇزەتۋ ىسىنە ولشەۋسىز ۇلەس قوسقان جاسىل كۇنقاعارلى جاۋىنگەرلەرگە ارنالعان. «مەملەكەتتىك شەكارا» كىتابىنداعى اڭگىمەلەر مەن وچەركتەر قاتارىنا تاۋەلسىز قازاقستاننىڭ شەكارا قىزمەتىنىڭ داڭقتى شەجىرەسىندەگى ايتۋلى دەگەن وقيعالار كىردى.
مۇندا شەكارا جاۋىنگەرلەرىنىڭ تىنىمسىز كۇندەرى، ءاربىر قازاقستاندىق ءۇشىن قاسيەتتى سانالاتىن ەل شەبىن كۇزەتۋ كەزىندەگى باستارىنان كەشىرگەن شيەلەنىسكە تولى وقيعالارىمەن ەرەكشەلەنەدى. كىتاپتى قولىنا الىپ، بەتتەرىن اشقان ساتتەن باستاپ، وقىرمان ءوزىن كەيىپكەرلەرمەن بىرگە ەل شەبىندە جۇرگەندەي، بىرەسە جاياۋ، بىردە اتپەن، تاعى بىردە يتپەن بىرگە قارۋىن سەرت ۇستاپ، تاۋ اسىپ، تاس باسقانداي، سۋ كەشىپ، تەڭىزدىڭ تولقىندارىنا قارسى جۇزگەندەي اسەرگە بولەنەدى.
شەكارادان وتكىزۋگە قاتاڭ تىيىم سالىنعان ەسىرتكى زاتىن تاسىمالداۋشىنى قۇرىقتاپ، تاۋدىڭ ىشىندە مال باعىپ بۇيىعى تىرشىلىك كەشىپ جاتقان شوپاننىڭ وتباسىن كەپىلگە العان قىلمىسكەردەن تايسالماعان شەكاراشىنى سۋ دا، ءورت تە العان بەتىنەن قايتارا المايتىنىن «مەملەكەتتىك شەكارا» سىر قىلىپ ايتىپ بەرەدى.
كىتاپتى قولىنا العان شەكاراشى ارداگەر وزىمەن بىرگە قىزمەت اتقارعان قارۋلاسىمەن قاۋىشادى، ال كىشى بۋىن شەكاراشىنى جاڭا ەرلىككە جەتەلەيدى. بۇل كىتاپ – قوعام دامۋىنا ۇلەس قوسا الاتىن ۇلگىلى ەڭبەك. اسىرەسە، ءوسىپ كەلە جاتقان جاستارعا تاۋەلسىز ەلىمىزدىڭ تىنىشتىعى شەكارادان باستالاتىنىن ۇيرەتەتىن تاماشا دۇنيە. ويتكەنى شەكارا – وتانىمىزدىڭ ايناسى.
«مەملەكەتتىك شەكارا» - شەكاراشىلار ءۇشىن عانا ەمەس، اسكەري ومىردەن تىسقارى قاراپايىم ادامدار ءۇشىن دە وقىلىمدى.
