شىمكەنت قالاسىندا «شاڭىراق» جەڭىلدەتىلگەن نەسيەلىك باعدارلاماسى بويىنشا تۇران شاعىن اۋدانىندا ورنالاسقان كەزەكتى 7 تۇرعىن ءۇي (№6ا،8ا،10ا،12ا،14ا،16ا،18ا) قولدانىسقا بەرىلدى. سالتاناتتى مەرەكەلىك شاراعا شىمكەنت قالاسى اكىمىنىڭ ورىنباسارى ماۋلەن ايمانبەتوۆ ارنايى قاتىسىپ، ينفراقۇرىلىمدىق كوممۋنالدىق قىزمەتتەرى ىسكە قوسىلعان پاتەرلەردىڭ يەلەرىنە پاتەر كىلتتەرىن تابىستادى.
- “جالپى تۇران شاعىن اۋدانىنىڭ دامۋ جوسپارىنا سايكەس شاشامەن 1,2 ملن. شارشى مەتردى قۇرايتىن 15,3 مىڭ پاتەرلى 319 كوپقاباتتى تۇرعىن ءۇيدىڭ قۇرىلىسى جوسپارلانعان. بۇگىنگى تاڭدا بيۋدجەت ەسەبىنەن 88 ءۇيدىڭ قۇرىلىسى جۇرگىزىلىپ، ونىڭ ىشىندە “شاڭىراق” باعىتىنىڭ قاتىسۋشالىرىنا 27 تۇرعىن ءۇي (1728) بويىنشا ازاماتتاردى قونىستاندىرۋ جۇمىستارى كەزەڭ-كەزەڭىمەن جۇزەگە اسىرىلۋدا. سونداي-اق 7-20-25 نەسيەلىك باعدارلاماسى بويىنشا 29 تۇرعىن ءۇيدىڭ (1800پاتەر) قۇرىلىسى بيىل اياقتالماق. بۇدان بولەك جالپى قالا اۋماعىندا نەسيەلىك بىرنەشە باعىتتاعى 50 تۇرعىن ءۇيدىڭ جوبالاۋ-سمەتالىق قۇجاتتاماسى ازىرلەنۋدە. اتالعان تۇرعىن ۇيلەردىڭ قۇرىلىس جۇمىستارى كەلەر جىلى باستالماق. بۇل كورسەتكىشتەر الداعى ۋاقىتتا ازاماتتاردىڭ باسپانا ماسەلەسىنىڭ شەشىلۋىنە ۇلكەن ىقپال ەتپەك”،-دەدى م. ايمانبەتوۆ.
“شاڭىراق” باعىتى بويىنشا باحىتكۇل نۋرمەتوۆا جىلدار بويى كۇتكەن باسپاناسىنا بۇگىن قول جەتكىزدى. ەكى بالانىڭ اناسى وسىدان بىرنەشە جىل بۇرىن تۇرعىن ءۇي كەزەگىنە مەملەكەتتىك قىزمەتكەر ساناتىمەن تىركەلگەن. بۇگىندە نەسيەلىك باسپاناعا قول جەتكىزگەن جالعىز باستى انانىڭ قۋانىشىندا شەك جوق.
قۇرىلىس باسقارماسىنىڭ جۇمىس جوسپارىنا سايكەس قازىرگى تاڭدا «شاڭىراق» باعدارلاماسىمەن تۇرعىن ۇيلەردىڭ قالعان ورامدارى بويىنشا اباتتاندىرۋ، جىلۋ سىندى ينفراقۇرىلىمدىق ينجەنەرلىك كوممۋنالدىق جۇيەلەردى ىسكە قوسۋ جۇمىستارى جۇرگىزىلۋدە. اتالعان باعىت بويىنشا جىل سوڭىنا دەيىن ينفراقۇرىلىمدىق كوممۋنالدىق قىزمەتتەرى قوسىلعان تاعى 14 تۇرعىن ۇيگە ازاماتتار قونىستاندىرىلاتىن بولادى.
بۇگىنگى تاڭدا مەملەكەت تاراپىنان حالىقتى قولجەتىمدى باسپانامەن قامتۋعا ەرەكشە ءمان بەرىلىپ كەلەدى. بيىل قالا اكىمدىگى تاراپىنان باسپاناعا مۇقتاج ازاماتتارعا قولداۋ رەتىندە تۇرعىن ءۇي سەرتيفيكاتىنا 500 ميلليون تەڭگە ءبولىندى. يپوتەكالىق تۇرعىن ءۇي قارىزى بويىنشا باستاپقى جارنانىڭ ءبىر بولىگىن جابۋ ءۇشىن قايتارىمسىز نەگىزدە ءار ازاماتقا 1 ميلليون تەڭگەگە دەيىن بەرىلەدى. بۇگىنگى جاڭا قونىس يەلەرىنىڭ 184-ءى دە اتالعان سەرتيفيكاتتى الىپ، باسپانالى بولىپ وتىر. باعدارلامانىڭ تالاپتارىنا سايكەس، تۇرعىن ءۇي كەزەگىندە تۇرعان ازاماتتار وتباسىنىڭ ورتاق تابىسى ەڭ تومەنگى كۇنكورىس دەڭگەيىنىڭ 3,7 ەسەلەنگەن مولشەرىنەن اسپاعان جاعدايدا قاتىسا الادى. 2021 جىلعا بۇل تابىس 126 917,4 تەڭگەنى قۇرادى. جىلدىق مولشەرى 5 پايىزدان اسپايتىن، العاشقى جارنا 10 پايىزبەن، 20 جىلعا جاڭا تۇرعىن ۇيلەردى ساتىپ الۋ مۇمكىندىگى قاراستىرىلعان. ەگەر ازاماتتاردىڭ اي سايىنعى تابىس كوزى جەتپەي جاتقان جاعدايدا، تۋىسى نەمەسە جاقىنى كەپىل بولا الادى.
