وزبەكستان دەنساۋلىق ساقتاۋ ءمينيسترىنىڭ ءبىرىنشى ورىنباسارى امريللو ينوياتوۆ سۋرحانداريا وبلىسىنىڭ دەناۋ قالاسىندا ورىن العان جارىلىستان نەبارى 11 ادامنىڭ زارداپ شەككەنىن كەرەمەت دەپ اتادى، دەپ حابارلايدى “ادىرنا” ۇلتتىق پورتالى.
«جارىلىس سالدارىنان ەكى ناۋقاس اۋىر حالدە اۋرۋحاناعا جەتكىزىلدى. سولاردىڭ ءبىرى، 1986 جىلى تۋعان فەرۋزا ومونوۆا عيماراتتىڭ جارىلىس كەزىندە وپىرىلىپ قۇلاعان بەتون ۇيىندىلەرىنىڭ استىندا قالدى. ونىڭ بىلەگى جۇلىنىپ، جامباس سۇيەگى سىنعان، دەنەسىنىڭ باسقا جەرلەرى دە جىرتىلىپ، ەزىلگەن.
الايدا، ماماندارىمىزدىڭ دەر كەزىندە كورسەتكەن كومەگىنىڭ ناتيجەسىندە ناۋقاس امان قالدى. كەشە ونىڭ جاعدايى اۋىر بولسا، قازىر جاعدايى ورتاشا، تۋىستارىمەن سويلەسىپ جاتىر.
ەكىنشى ناۋقاستىڭ ميى شايقالعان. اۋىر جاعدايدا اۋرۋحاناعا جاتقىزىلدى. وعان دا ەڭ بىلىكتى دارىگەرلەر ات سالىسۋدا. ونىڭ جاعدايى تۇراقتى. اۋىر جاعدايدا تۇسكەن ەكى ناۋقاس جانساقتاۋ بولىمىنەن جالپى پالاتاعا اۋىستىرىلدى.
تاعى ەكى ناۋقاستا كوپتەگەن اۋىر جاراقاتتار، سىنىق بولدى. جارىلىس كەزىندە ولاردىڭ ءبىرى عيمارات ىشىندە، ەكىنشىسى سىرتتا بولعان. ولاردىڭ سىنعان سۇيەكتەرى قالپىنا كەلتىرىلۋدە.
وزبەكستاننىڭ باس پروكۋراتۋراسى دەناۋداعى جارىلىستى لاڭكەستىك ارەكەت دەگەن بولجامنىڭ راستالماعانىن حابارلادى. باس پروكۋروردىڭ ءباسپاسوز حاتشىسى حايوت شامسۋددينوۆ بۇل فاكتى بويىنشا وزبەكستان رەسپۋبليكاسى قىلمىستىق كودەكسىنىڭ 257-بابى جانە 259-بابى ء(ورت قاۋىپسىزدىگى ەرەجەلەرىن بۇزۋ) بويىنشا قىلمىستىق ءىس قوزعالىپ، تەرگەۋ ءجۇرىپ جاتقانىن حابارلادى.
”ادىرنا” ۇلتتىق پورتالى
