Ózbekstan Densaýlyq saqtaý mınıstriniń birinshi orynbasary Amrıllo Inoıatov Sýrhandarııa oblysynyń Denaý qalasynda oryn alǵan jarylystan nebári 11 adamnyń zardap shekkenin keremet dep atady, dep habarlaıdy “Adyrna” ulttyq portaly.
«Jarylys saldarynan eki naýqas aýyr halde aýrýhanaǵa jetkizildi. Solardyń biri, 1986 jyly týǵan Ferýza Omonova ǵımarattyń jarylys kezinde opyrylyp qulaǵan beton úıindileriniń astynda qaldy. Onyń bilegi julynyp, jambas súıegi synǵan, denesiniń basqa jerleri de jyrtylyp, ezilgen.
Alaıda, mamandarymyzdyń der kezinde kórsetken kómeginiń nátıjesinde naýqas aman qaldy. Keshe onyń jaǵdaıy aýyr bolsa, qazir jaǵdaıy ortasha, týystarymen sóılesip jatyr.
Ekinshi naýqastyń mıy shaıqalǵan. Aýyr jaǵdaıda aýrýhanaǵa jatqyzyldy. Oǵan da eń bilikti dárigerler at salysýda. Onyń jaǵdaıy turaqty. Aýyr jaǵdaıda túsken eki naýqas jansaqtaý bóliminen jalpy palataǵa aýystyryldy.
Taǵy eki naýqasta kóptegen aýyr jaraqattar, synyq boldy. Jarylys kezinde olardyń biri ǵımarat ishinde, ekinshisi syrtta bolǵan. Olardyń synǵan súıekteri qalpyna keltirilýde.
Ózbekstannyń bas prokýratýrasy Denaýdaǵy jarylysty lańkestik áreket degen boljamnyń rastalmaǵanyn habarlady. Bas prokýrordyń baspasóz hatshysy Haıot Shamsýddınov bul fakti boıynsha Ózbekstan Respýblıkasy Qylmystyq kodeksiniń 257-baby jáne 259-baby (Órt qaýipsizdigi erejelerin buzý) boıynsha qylmystyq is qozǵalyp, tergeý júrip jatqanyn habarlady.
”Adyrna” ulttyq portaly
