8 جەلتوقسان كۇنى قازاقستان جازۋشىلار وداعى نۇر-سۇلتان قالالىق فيليالىندا قازاقستان رەسپۋبليكاسىنىڭ تاۋەلسىزدىگىنىڭ 30 جىلدىعىنا ارنالعان «تاۋەلسىزدىككە تاعزىم» اتتى مادەني-ادەبي ءىس-شارا ءوتتى.
ءىس-شاراعا اقىن، قر مەملەكەتتىك سىيلىعىنىڭ يەگەرى نەسىپبەك ايتۇلى، اقىن تاناكوز تولقىنقىزى، «دارىن» مەملەكەتتىك جاستار سىيلىعىنىڭ يەگەرى ءبىرجان احمەر، ەربول بەيىلحان، قر جازۋشىلار وداعى نۇر-سۇلتان قالالىق فيليالى ديرەكتورىنىڭ ورىنباسارى ولجاس قاسىم، اقىن، «ادەبيەت» پورتالىنىڭ ءتىلشىسى ارمان شەريزات، قازاقستان جازۋشىلار وداعى اقمولا وبلىستىق فيليالىنىڭ ديرەكتورى مەرگەن توقسانباي، جازۋشىلار وداعىنىڭ مۇشەسى قۋانىش وسپان، اقىن تابىسبەك ۇسەن، اقىن سەرىكباي ءابىلماجىن قاتىستى.
ادەبي كەشتى اقىن، قازاقستان جازۋشىلار وداعىنىڭ نۇر-سۇلتان قالالىق فيليالىنىڭ ديرەكتورى داۋلەتكەرەي كاپۇلى جۇرگىزدى. العاش بولىپ ءسوز العان اقىن، «بوستاندىق جىرىنىڭ بوزجورعاسى» اتانعان نەسىپبەك ايت ازاتتىقتىڭ ارقاسىندا ءسوز بوستاندىعىنىڭ كۇرمەۋى شەشىلىپ، قالامگەرلەردىڭ ەركىن قۇلاش سەرمەۋىنە جول اشىلعانىن ءسوز ەتتى. تاۋەلسىزدىكتىڭ تۇعىرلى بولۋى ءۇشىن جاس -اقىن جازۋشىلاردى ەگەمەندىكتىڭ جارقىن ساتتەرىن جىرلاۋعا شاقىردى.
ايتۋلى شاراعا اقمولا وبلىسىنان كەلگەن اقىندار تاۋەلسىزدىكتىڭ اق تاڭى تۋعاندىقتان، كوكشە ءوڭىرىنىڭ قازاقىلانىپ جاتقانىن تىلگە تيەك ەتتى. جاقىندا قازاقستان جازۋشىلار وداعى اقمولا وبلىستىق فيليالىنا ديرەكتور بولىپ تاعايىندالعان مەرگەن توقسانباي كوكشەتاۋ قالاسىندا كوشەلەرگە الاشتىڭ كورنەكتى تۇلعالارىنىڭ ەسىمى بەرىلگەنىن، وعان قالامگەرلەر قاۋىمىنىڭ تيگىزگەن زور ۇلەسىن اتاپ ءوتتى.
سونداي-اق، كوكشەتاۋلىق اقىندار قۋانىش وسپان مەن تابىسبەك ۇسەن ءبىرجان سال، اقان سەرىنىڭ وتانىندا اۋىز تولتىرىپ ايتارلىق ادەبي ۇردىستەردىڭ جولعا قويىلعانىن قۋانىشپەن جەتكىزدى. كەشكە قاتىسۋشىلار ءتاۋ ەتەر تاۋەلسىزدىكتىڭ تامىرى تەرەڭگە جايىلسىن دەگەن تىلەكپەن تارقاستى.
“ادىرنا” ۇلتتىق پورتالى
