Táýelsizdikke taǵzym jasaldy

2481
Adyrna.kz Telegram

8 jeltoqsan kúni Qazaqstan Jazýshylar odaǵy Nur-Sultan qalalyq fılıalynda Qazaqstan Respýblıkasynyń Táýelsizdiginiń 30 jyldyǵyna arnalǵan «Táýelsizdikke taǵzym» atty mádenı-ádebı is-shara ótti.

Is-sharaǵa aqyn, QR Memlekettik syılyǵynyń ıegeri Nesipbek Aıtuly, aqyn Tanakóz Tolqynqyzy, «Daryn» memlekettik jastar syılyǵynyń ıegeri Birjan Ahmer, Erbol Beıilhan, QR Jazýshylar odaǵy Nur-Sultan qalalyq fılıaly dırektorynyń orynbasary Oljas Qasym, aqyn, «Ádebıet» portalynyń tilshisi Arman Sherızat, Qazaqstan Jazýshylar odaǵy Aqmola oblystyq fılıalynyń dırektory Mergen Toqsanbaı, Jazýshylar odaǵynyń múshesi Qýanysh Ospan, aqyn Tabysbek Úsen, aqyn Serikbaı Ábilmájin qatysty.

Ádebı keshti aqyn, Qazaqstan Jazýshylar Odaǵynyń Nur-Sultan qalalyq fılıalynyń dırektory Dáýletkereı Kápuly júrgizdi. Alǵash bolyp sóz alǵan aqyn, «Bostandyq jyrynyń bozjorǵasy» atanǵan Nesipbek Aıt azattyqtyń arqasynda sóz bostandyǵynyń kúrmeýi sheshilip, qalamgerlerdiń erkin qulash sermeýine jol ashylǵanyn sóz etti. Táýelsizdiktiń tuǵyrly bolýy úshin jas -aqyn jazýshylardy egemendiktiń jarqyn sátterin jyrlaýǵa shaqyrdy.

Aıtýly sharaǵa aqmola oblysynan kelgen aqyndar Táýelsizdiktiń aq tańy týǵandyqtan, Kókshe óńiriniń qazaqylanyp jatqanyn tilge tıek etti. Jaqynda Qazaqstan Jazýshylar odaǵy Aqmola oblystyq fılıalyna dırektor bolyp taǵaıyndalǵan Mergen Toqsanbaı Kókshetaý qalasynda kóshelerge Alashtyń kórnekti tulǵalarynyń esimi berilgenin, oǵan qalamgerler qaýymynyń tıgizgen zor úlesin atap ótti.

Sondaı-aq, kókshetaýlyq aqyndar Qýanysh Ospan men Tabysbek Úsen Birjan sal, Aqan seriniń otanynda aýyz toltyryp aıtarlyq ádebı úrdisterdiń jolǵa qoıylǵanyn qýanyshpen jetkizdi. Keshke qatysýshylar táý eter Táýelsizdiktiń tamyry tereńge jaıylsyn degen tilekpen tarqasty.

“Adyrna” ulttyq portaly

Pikirler