شىمكەنتتە پوليتسيا دەپارتامەنتىنە ءوز اياعىمەن كىرگەن كۇدىكتىنىڭ ءمايىتى شىقتى. نۇربولات جۇماباەۆپەن بىرگە پوليتسيا عيماراتىنا جەتكىزىلگەن دوسى وقيعانىڭ قالاي بولعانىن ايتىپ بەردى، دەپ حابارلايدى “كتك” ارناسى.
جاقىندارىنىڭ ايتۋىنشا، نۇربولات جۇماباەۆ قوستانايدان دوسىمەن بىرگە شىمكەنتكە قالىڭدىعىن اكەتۋگە كەلگەن ەكەن. ءدامحانادا تۇستەنىپ وتىرعان ەكەۋدى ارنايى جاساق قولىنا كىسەن سالىپ الىپ كەتكەن.
پوليتسيا دەپارتامەنتى تاراتقان اقپاراتتا قالىڭدىق تۋرالى ءسوز جوق. شىمكەنتكە كولىك ۇرلاۋعا كەلدى دەگەن كۇدىكتىنىڭ دەنساۋلىعى دىمكاس بولۋى مۇمكىن دەپ وتىر ءتارتىپ ساقشىلارى.
نۇربولات جۇماباەۆ دوسىمەن بىرگە قوستانايدان شىمكەنتكە بەس كۇن بۇرىن كەلىپتى. قالىڭدىعىن ۇيىنە اپارۋ ءۇشىن كەلگەن جىگىتى جانىنداعى دوسىمەن ءدامحانادا وتىرعان جەرىنەن ارنايى جاساق قولىن قايىرىپ اكەتكەن.
"كولىككە وتىرعىزعاننان باستاپ باسىمىزعا قاپشىق كيگىزىپ ۇرا باستادى. دەپارتامەنتكە جەتكىزگەندە تەپكى ۇدەي ءتۇستى. مەن دوسىمدى سوڭعى مارتە كورگەندە پوليتسەيلەر ۇرىپ جاتقان. ودان سوڭ ەكەۋىمىزدى بولەك اكەتتى. مەنىڭ قولىمدى كىسەندەپ، جەرگە جاتقىزىپ باسىمنان تەپتى. ءبىر مارتە باسىما كيگىزگەن قاپشىقتى شەشىپ، ءتۇرىن جاتتاپ ۇلگەردىم. ولار 3-4 جەدەل ۋاكىل مەن تاعى ارنايى جاساقتىڭ جىگىتتەرى. "سەندەر كولىك ۇرلادىڭدار، سوندىقتان مويىنداڭدار، كورشى كابينەتتەگى دوسىڭ مويىنداۋعا شاق قالدى" دەپ كۇشتەدى. ء"وز ەركىڭمەن قول قويماساڭ، دەنساۋلىعىڭنان ايرىلاسىڭ"دەپ قورقىتتى”، – دەيدى جابىرلەنۋشى سەرگەي پەتروۆ.
بىراق جەدەل ۋاكىلدەرمەن كىرگىزىلگەن نۇربولات جۇماباەۆ كابينەتتەن ءتىرى شىققان جوق. تەرگەۋ كەزىندە جاعدايى كۇرت ناشارلاعان 31 جاستاعى جىگىت جەدەل جاردەم كەلگەنشە كوز جۇمعان.
مارقۇم نۇربولات جۇماباەۆتىڭ ادۆوكاتى دا پوليتسەيلەر ورەسكەل زاڭبۇزۋشىلىققا بارعانىن ايتادى.
ء“ۇش ساعاتتان استام زاڭسىز ۇستاپتى. نەگە بۇل ۋاقىتتا ادۆوكات بەرمەگەن؟ ودان سوڭ جەدەل ۋاكىلدەر نەگە تەرگەۋشىگە دەيىن جەتكىزبەگەن؟ تەرگەۋ مەن زاڭدى شەشىم قابىلداۋ تەرگەۋشىنىڭ قۇزىرىندا ەمەس پە؟ قىلمىس جاساعان كۇننىڭ وزىندە نەگە ارنايى جاساقپەن ۇستايدى؟ بۇلار قىلمىستىق توپتىڭ مۇشەسى ەمەس قوي. نەگە زاڭ بويىنشا شاقىرتۋ قاعازىن جىبەرمەگەن؟” – دەيدى جابىرلەنۋشىنىڭ قورعاۋشىسى تالعات ەسىموۆ.
بۇل سۇراقتارعا جاۋاپ بەرۋ ءۇشىن پوليتسيا دەپارتامەنتى باستىعىنىڭ ءوزى شىقتى. گەنەرالدىڭ سوزىنشە، ادۆوكات شاقىرتىلعان ەكەن. ال نۇربولات جۇماباەۆپەن سەرىگى سەرگەي پەتروۆ بىرنەشە كولىك ۇرلاۋ دەرەگى بويىنشا كۇدىكتى رەتىندە ءوتىپتى. ءتىپتى بۇلتارتپاس دالەلدەرى دە بار ەكەن. ال تەرگەۋ كابينەتىندە "كامەرالار بار" دەگەن ول ءمان-جاي تەك ساراپتاما قورىتىندىسىنان كەيىن اشىلادى دەپ وتىر.
“دالىزدە ورناتىلعان، كابينەتتە بار. كابينەتتە سويلەسكەن، سول جەردە جىگىتتەرگە "مازام بولماي تۇر" دەگەن. كەشىرىڭىزدەر، ءبىز دارىگەر ەمەسپىز. اركىمدە ءارتۇرلى جاعداي بولادى. ەندى ساراپتاما شەشىمىن كۇتەيىك”، – دەيدى شىمكەنت قالاسى پوليتسيا باسقارماسىنىڭ باسشىسى ەرالى جۇماحانبەتوۆ
قازىر بۇل ىسپەن قالالىق پروكۋراتۋرا مەن مينيسترلىكتىڭ وزىندىك قاۋىپسىزدىگىنەن كەلگەن لاۋازىمدى شەندىلەر اينالىسىپ جاتىر.
"شىمكەنتتىڭ سوت-ساراپتاماسىنا سەنبەيمىز" دەگەن مارقۇمنىڭ جاقىندارى تاۋەلسىز ساراپتامانىڭ كومەگىنە جۇگىنبەكشى. ال ءبىر اپتادان سوڭ ۇيلەنۋ تويى بولادى دەپ كۇتىپ جۇرگەن نۇربولات جۇماباەۆتىڭ دەنەسى بىرەر كۇندە تۋعان قالاسى قوستانايدا جەرلەنەدى.
“ادىرنا” ۇلتتىق پورتالى
