شىمكەنت: ينسۋلت ورتالىعى تاۋلىك بويى قىزمەت كورسەتۋگە كوشتى

753
Adyrna.kz Telegram

ەندى تاۋلىكتىڭ كەز كەلگەن ۋاقىتىندا ينسۋلت العان ناۋقاستارعا دارىگەرلەر شۇعىل مەديتسينالىق كومەك كورسەتىپ، وتا جاساي الادى. وسىلايشا مەديتسينا ماماندارى ءولىم-ءجىتىم كورسەتكىشىنىڭ الدىن الىپ، ءينسۋلتتىڭ سالدارىنان پايدا بولاتىن مۇگەدىكتىك سانىن ازايتپاق.

اۋرۋحانانىڭ باس دارىگەرى اسقار راحمەتاليەۆتىڭ باستاماسىمەن ناۋقاستار تۇنگى ۋاقىتتا دا ەم قابىلداۋى ءۇشىن وسىنداي قولايلى جاعداي جاسالىپ وتىر. قالالىق №2 اۋرۋحانا بازاسىنان كوۆيد ورتالىعى اشىلىپ، ءۇش اي بويى ەمدەۋ ورتالىعىنىڭ ماماندارى قاۋىپتى ىندەتكە شالدىققان ناۋقاستارعا ەمدەۋ جۇمىستارىن جۇرگىزدى. مۇندا ينفەكتسيالىق ستاتسيونار جۇمىسىن توقتاتىپ، 17 قىركۇيەكتەن بەرى اۋرۋحانا قالىپتى رەجيمدە جۇمىس ىستەۋدە. ال اۋرۋحانا بازاسىنداعى ينسۋلت ورتالىعى بىردەن تاۋلىك بويى جۇمىس ىستەۋگە كوشتى.

ايتا كەتەيىك، قالالىق №2 اۋرۋحانادا سوڭعى ۇلگىدەگى ەكسپرەرت كلاستى بيپلاندى Philips Azurion 7 ۆ20/15 انگيوگرافيالىق اپپاراتى مەن وكپەنى جاساندى تىنىستاندىرۋ، تسيفرلى رەنگەن سىندى ينسۋلت اۋرۋىن ەمدەۋگە قاجەت اپپاراتتار ورناتىلعان. زاماناۋي قۇرىلعىلارمەن ليتۆا، گەرمانيا، فرانتسيا، ۇلىبريتانيا، وڭتۇستىك كورەيا، تۇركيا، رەسەي فەدەراتسياسىندا بىلىكتىلىگىن ارتتىرىپ كەلگەن ماماندار جۇمىس ىستەيدى.

24 ساعاتتىق رەجيمدەگى ينسۋلت ورتالىعىندا بىلىكتى ماماندار 20 ناۋقاسقا كۇردەلى وتا جاساپ ۇلگەردى. ونىڭ ىشىندە 18 ناۋقاسقا ينسۋلت، 2 ناۋقاسقا جۇرەك-قان تامىرلارى بويىنشا تىلىكسىز وپەراتسيا جاسالدى. حيرۋرگيالىق ەم جاسالعان ناۋقاستاردىڭ بارلىعىنىڭ دا ەم قابىلداۋ بارىسىندا جاعدايى جاقسارىپ، پالاتاعا اۋىستىرىلعان.

پىكىرلەر