ورتالىق كوممۋنيكاتسيالار قىزمەتى الاڭىندا «قازاقستان» رترك» اق باسقارما توراعاسى ەرلان قارين ۇلتتىق ارنانىڭ كوكتەمگى تەلەۆيزيالىق ماۋسىمىمەن تانىستىرىپ، 2017 جىلدىڭ نەگىزگى جەتىستىكتەرىن اتاپ ءوتتى.
قازاقتىڭ ءتول ونەرىن دارىپتەيتىن «مەن قازاقپىن» حالىقارالىق مۋزىكالىق جوباسى مەن 8 مەملەكەتتە تىكەلەي ترانسلياتسيا ارقىلى كورسەتىلگەن «SilkWayStar» مەگاجوباسى كورەرمەندەر اراسىندا جوعارى باعالانىپ، وتكەن ماۋسىمنىڭ باستى جاڭالىعى بولدى.
سونداي-اق، 2017 جىلى «پاراسات مايدانى»، «1ستۋديا»، «باستى تاقىرىپ»، «ماسەلە»، «ەلدەن حابار» جانە ت.ب قوعامدىق-ساياسي جانە اقپاراتتىق-ساراپتامالىق جوبالاردىڭ سانى ارتىپ، كورەرمەنگە جول تارتتى.
سونىمەن قاتار، ۇلتتىق ارنا مەملەكەتتىك ماڭىزى جوعارى تۇسىرىلىمدەر مەن تىكەلەي ترانسلياتسيالاردى جۇزەگە اسىردى. اتاپ ايتساق، 2017 جىلعى قىسقى ۋنيۆەرسيادا، اسكەري شەرۋ، حالىقارالىق مامانداندىرىلعان «استانا ەكسپو-2017» كورمەسىنىڭ اشىلۋى مەن جابىلۋ سالتاناتى، قر پرەزيدەنتىنىڭ قاتىسۋىمەن وتكەن يندۋستريالاندىرۋ كۇنىنە ارنالعان ەلىمىزدىڭ 26 نىسانىن قامتىعان تەلەكوپىر.
«وتكەن جىلى كونتەنتتى جاڭارتۋ بارىسىندا الەۋمەتتىك جوبالاردىڭ سانى ارتىپ، اقپاراتتىق-ساراپتامالىق باعدارلامالاردىڭ فورماتى وزگەردى. ەڭ باستىسى، ءوزىمىزدىڭ ىشكى تەلەونىمنىڭ ۇلەسى 80%-عا ءوستى. ءبىز ءارى قاراي دا كونتەنتتى جاڭارتۋ جۇمىستارىن جالعاستىرىپ، ساپالى تۋىندىلاردىڭ سانىن ارتتىرۋعا اتسالىسامىز»، - دەدى باسقارما توراعاسى ەرلان قارين.
ۇلتتىق تەلەارنادا جاڭا تەلەۆيزيالىق ماۋسىم ءداستۇر بويىنشا ناۋرىز ايىنىڭ باسىنان باستالماق. «Qazaqstan» تەلەارناسىنان بىرنەشە جاڭا جوبالار مەن تەلەحيكايالار كورەرمەنگە جول تارتادى. بۇرىننان كەلە جاتقان تانىمال جوبالاردىڭ جۇرگىزۋشىلەرى اۋىسىپ، جاڭا فورماتتا شىعا باستايدى. ەندى «تۇنگى ستۋديانى» اكتەر ءارى سىقاقشى قايرات ادىلگەرەي جۇرگىزسە، «سەنبىلىك شوۋدىڭ» تىزگىنىن تۇرسىنبەك قاباتوۆ ۇستايدى. سونداي-اق، جاڭا ماۋسىم اياسىندا اقپان ايىندا ەفيرگە شىققان «باقىتتى ايەل» توك-شوۋى قىز-كەلىنشەكتەر اراسىندا ۇلكەن سۇرانىسقا يە بولىپ كەلەدى.
الداعى ۋاقىتتا ەلىمىزدىڭ تاريحىنان سىر شەرتەتىن «الاش اقيقاتى» باعدارلاماسى، «بالا كوڭىلى» اتتى بالالار تاربيەسىن قوزعايتىن گۋمانيتارلىق-اعارتۋشىلىق جوبا، «ءجۇرسىننىڭ جۇيرىكتەرى» اتتى اقىندار ايتىسى شىعاتىن بولادى. «ءجۇرسىننىڭ جۇيرىكتەرى» باعدارلاماسىنىڭ قازىلار القاسى قاتارىندا بەلگىلى ونەر قايراتكەرلەرى - قازاق كينوسىنىڭ مايتالمانى، قر حالىق ءارتىسى ءاسانالى ءاشىموۆ، ءانشى ءارى كومپوزيتور، قر حالىق ءارتىسى التىنبەك قورازباەۆ، پروفەسسور، عىلىم دوكتورى نامازالى وماشەۆ پەن قر حالىق اقىنى اسيا بەركەنوۆا بار. ال، جوبانىڭ باستى قوناعى - قر ەڭبەك سىڭىرگەن قايراتكەرى، اقىن جانە جۋرناليست ءجۇرسىن ەرمان.
سونىمەن قاتار، ۇلتتىق ارنا جاس اۋديتوريانى ارتتىرۋ ماقساتىندا، قىزىقتى ءارى ەرەكشە «Q-pop Idols» اتتى جوبانىڭ تۇساۋىن كەسپەك. بۇل جوبانىڭ جەتەكشىسى - بەلگىلى مۋزىكانت، پروديۋسەر ەربولات بەدەلحان.
جاڭا ماۋسىم اياسىندا سونداي-اق، بىرقاتار جاڭا وتاندىق تەلەحيكايالار ۇسىنىلاتىن بولادى. 26 ناۋرىزدا الاش زيالىلارىنىڭ 20-شى عاسىردىڭ باسىندا تاۋەلسىزدىك جولىنداعى تاعدىرىن باياندايتىن «تار زامان» تەلەحيكاياسى ەفيرگە شىعادى. ودان بولەك، كورەرمەندەر «تۋعان جەر»، «سۇيە بىلسەڭ-2»، «جارالانعان جۇرەكتەر»، «ىڭكار جۇرەك-3» جانە ت.ب تەلەحيكايالاردى تاماشالايتىن بولادى. بەلگىلى بولعانداي، بيىل
قازاق تەلەۆيزياسى 60 جىلدىق مەرەيتويىن اتاپ وتۋدە.
وسى ايتۋلى مەرەكە قارساڭىندا «Qazaqstan» تەلەارناسى بىرنەشە ءىس شارالاردى وتكىزىپ كەلەدى. «ۇلتتىق ارنادا ءار جىلدارى كوپتەگەن تانىمال تۇلعالار، زيالى قاۋىم وكىلدەرى ەڭبەك ەتىپ، قازاق تەلەۆيزياسىنىڭ دامۋىنا زور ۇلەستەرىن قوستى.
ولاردىڭ اتقارعان ەڭبەگىن ۇمىتپاۋ - ءبىزدىڭ پارىزىمىز. اقپاننىڭ باسىنان باستاپ، ءار جەكسەنبى سايىن ۇلتتىق ارنانىڭ «التىن قورىندا» ساقتالعان، كەزىندە كورەرمەننىڭ كوڭىلىنەن ورىن العان بۇرىنعى باعدارلامالاردى ەفيرگە شىعارۋدى ۇيعاردىق.
سونداي-اق، «تاڭشولپان»، «دارا جول»، «كەلبەت» جانە باسقا دا باعدارلامالاردا وتاندىق تەلەۆيزيا ارداگەرلەرىنىڭ قاتىسۋىمەن ارنايى شىعارىلىمدار جارىق كورەدى. مۇنىمەن قوسا، كورەرمەندەرگە توسىنسىي رەتىندە بۇرىنعى تەلەجۋرناليستەر مەن ديكتورلار جۇرگىزۋشى رەتىندە ەفيرگە شىعاتىن بولادى»، - دەدى باسقارما توراعاسى ە.قارين.
Aidyn Egizova
kaztrk.kz
