الماتى قالاسى مەكتەپتەرىندە پىكىرسايىس بويىنشا سەمينار-ترەنينگ وتكىزىلدى

2788
Adyrna.kz Telegram

ءبىلىم جانە عىلىم ءمينيسترى ا.ايماعانبەتوۆ پىكىرسايىس ويىندارىنىڭ مەكتەپ وقۋشىلارىنا دەگەن قاجەتتىلىگىن كورسەتىپ، بارلىق وڭىردە پىكىرسايىس قوزعالىستارىن دامىتۋ يدەياسىن كوتەرۋدى تاپسىردى.

سوعان وراي 15 قاراشادان باستاپ قازاقستان رەسپۋبليكاسى ءبىلىم جانە عىلىم مينيسترلىگىنىڭ «رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعى» رمقك باستاماسىمەن جانە الماتى قالاسى ءبىلىم باسقارماسىنىڭ قولداۋىمەن الماتى قالاسىنىڭ ءبىلىم بەرۋ مەكەمەلەرىندە دەباتتىق قوزعالىستى دامىتۋ اياسىندا بوستاندىق، مەدەۋ، ناۋرىزباي جانە اۋەزوۆ مەكتەپتەرىنىڭ بازاسىندا دەباتقا وقۋشىلاردى جاپپاي تارتۋ، دەبات كلۋبتارىن قۇرۋ ارقىلى ولاردىڭ ىنتاسىن ارتتىرۋ، سىني ويلاۋ، كوممۋنيكاتسيا، شەشەندىك ونەر داعدىلارىن، لوگيكالىق دالەل، تالداۋ، شەشىم قابىلداۋ، سىندارلى ديالوگ جۇرگىزۋ جانە ت.ب. ماقساتىندا دەبات قوزعالىسىنىڭ وزەكتى ماسەلەلەرى بويىنشا وقىتۋ سەمينار-ترەنينگتەرى وتكىزىلدى.

المالى اۋدانى №46 گيمنازيا، №134 ليتسەي، №67 جببم جانە ناۋرىزباي اۋدانى №200 گيمنازيا، №186 جببم، بوستاندىق اۋدانى №21 گيمنازيا، №92 ليتسەي، №63 جببم، №70 جببم مەكتەپتەرى بازاسىندا جۇزەگە استى. سەمينار-ترەنينگتى پىكىرسايىستا جەتى-سەگىز جىلدىق تاجىريبەسى بار، قالالىق، وبلىستىق جانە رەسپۋبليكالىق تۋرنيرلەردە ورىن العان پىكىرسايىسشىلار جۇرگىزۋدە.

سەمينار تەوريالىق جانە پراكتيكالىق بولىمدەردەن تۇرادى. تەوريالىق بولىمدە پىكىرسايىستىڭ ماڭىزدىلىعى مەن ەرەجەلەرى، ارگۋمەنتاتسيا قۇرۋ، ساراپتاما، سونداي-اق پىكىرسايىس تاكتيكالارى قاراستىرىلعان. پراكتيكالىق بولىمدە ترەنيرلەر كورسەتىلىم دەبات ويىنىن كورسەتىپ، ارتىنشا وقۋشىلار ءتۇرلى تاقىرىپتار بويىنشا پىكىرتالاستىردى. لوگيكانى جانە زەرەكتىكتى دامىتاتىن ينتەللەكتۋالدى ويىندار ويناپ، ءۇي جۇمىسىنا اتاقتى پىكىرسايىسشىلاردىڭ ويىنىن، پىكىرسايىس تۋرالى فيلمدەردى تالدادى.

كوشباسشىلىق قابىلەتتى دامىتۋ ماقساتىندا وقۋشىلار اراسىندا كىشىگىرىم پرەزيدەنتتىك سايلاۋ جاساپ، كانديداتتار شەشەندىك پەن شەبەرلىكتەرىن ورتاعا سالادى. پىكىرسايىسشى-ترەنەرلەر وقۋشىلارعا كوپشىلىك الدىندا قورقىنىشىن جەڭىپ، سەنىمدى ءارى ناقتى سويلەۋدىڭ قىر-سىرىمەن ءبولىستى. ءار اۋدان بويىنشا سەمينار-ترەنينگتى قورىتىندىلاۋ ءۇشىن ىشكى تۋرنير ۇيىمداستىرىلىپ، قاتىسۋشىلار اراسىنان جەڭىمپاز انىقتالادى.
قازىرگى تاڭدا ورىس جانە قازاق ليگاسىنان بارلىعى 1000-عا جۋىق بالا قامتىلدى. بۇل جوبا 28 جەلتوقسانعا دەيىن جالعاسىن تابادى. وسى ۋاقىت ارالىعىندا وقۋشىلار سەمينار-ترەنينگ بويىنشا جىلى لەبىزدەرىمەن ءبولىسىپ، كەرى بايلانىس جاسادى. ولار العان داعدىلارىن ءتۇرلى سالالاردا پايدالانۋ جولىن ءتۇسىندى. تانىم كوكجيەگىن دامىتاتىن كىتاپتار مەن بەينەجازبالار لەگىمەن تانىسا وتىرىپ، مەكتەپ باعدارلاماسىنان تىس ءبىلىم بازاسىن جيناقتادى.

ترەنينگكە قاتىسۋشىلار دەبات فورماتتارىن ۇيرەندى. الداعى ۋاقىتتا الماتى قالاسىندا ۇيىمداستىرىلاتىن ءارتۇرلى دەبات فورماتتارى بويىنشا پىكىرسايىس تۋرنيرلەرىنە دايىن.
سەمينار-ترەنينگ ناتيجەسى بويىنشا وقۋشىلار وي ەركىندىگىنە قول جەتكىزىپ، “برەينشتورمينگ”، “مينتو پيراميداسى” ادىستەرى ارقىلى كرەاتيۆتىلىك پەن جاڭا يدەيالاردى تۋىنداتۋ جولدارىن ۇيرەندى، ءتىل تازالىعىن ساقتاپ، ءسوزىن سەنىمدى، دايەكتى جەتكىزە باستادى.

پىكىرلەر