شاھاردىڭ باس دارىگەرى باقىتجان پوزيلوۆتىڭ مالىمدەۋىنشە، قالادا كوروناۆيرۋس ىندەتىنە قاتىستى ەپيدەميولوگيالىق احۋال تۇراقتالا باستادى. 16 قىركۇيەكتەگى ستاتيستيكا بويىنشا مەگاپوليستە 122 ادامنان كۆي انىقتالعان. بۇعان دەيىن قالاداعى تاۋلىكتىك نورما 450-500-ءدىڭ شاماسىندا بولاتىن.
– جاھاندى جايلاعان ىندەتپەن كۇرەستىڭ ەڭ ءتيىمدى دە دۇرىس جولى – وعان قارسى جاپپاي ەكپە سالدىرۋ، ۇجىمدىق يممۋنيتەتتى قالىپتاستىرۋ. بۇل – الەم مويىنداعان شەشىم، ونى مەملەكەت باسشىسى قاسىم-جومارت توقاەۆ تا شەگەلەپ ايتىپ كەلەدى. دەنساۋلىق ساقتاۋ مينيسترلىگى الدىندا قىركۇيەك ايىنا دەيىن ەلىمىزدىڭ 10 ميلليون ازاماتىن ىندەتكە قارسى ۆاكتسينالاۋ جوسپارى قويىلعان بولاتىن. بۇگىندە ەل تۇرعىندارىنىڭ 60 پايىزى ەكپە سالدىردى. قالامىزدا ۆاكتسيناتسيالاۋ كورسەتكىشى 86 پايىزدان استى.
شىمشاھاردا بۇگىندە كوروناۆيرۋس ينفەكتسياسىنا قارسى ۆاكتسينالاۋ بويىنشا 40-تان استام بەكەت جۇمىس ىستەپ تۇر. شاhارداعى بارلىق ەمحانادا كوۆيدكە قارسى ۆاكتسينالاۋ ودان ءارى جالعاسىن تابۋدا. ەكپە الۋ بەكەتتەرى سەنبى-جەكسەنبى كۇندەرى ساعات 08:00-20:00 ارالىعىندا جۇمىس ىستەيدى. ۆاكتسينالار جەتكىلىكتى. ماقساتىمىز – تۇرعىنداردى 100 پايىز ۆاكتسيناتسيالاۋ، - دەيدى
ب.پوزيلوۆ.
قازىرگى تاڭدا COVID-19 ىندەتىمەن تىركەلگەندەر سانى ازايىپ كەلەدى. شىمشاھار بويىنشا تۇراقتى تۇردە جالپى 4350 ينفەكتسيالىق، كارانتيندىك جانە رەانيماتسيالىق توسەك-ورىن ۇيىمداستىرىلعان. كوروناۆيرۋستىق ينفەكتسيانىڭ ءارتۇرلى ستسەناريىنە بايلانىستى ينفەكتسيالىق توسەك-ورىن سانىن 5 مىڭعا دەيىن ۇلعايتۋعا مۇمكىندىك بار. دەگەنمەن شىمكەنتتە ىندەتكە شالدىققاندار كۇن سايىن ازايىپ كەلەدى. سونىڭ دالەلى قالاداعى پروۆيزورلىق ستاتسيونارلارداعى توسەك-ورىنداردىڭ 50 پايىزدان استامى بوسادى. ناقتىراق ايتقاندا، 4 350 توسەك ورىننان 2 397-ءى قىسقارعان.
– بۇگىنگە دەيىن قالادا 25 ينفەكتسيالىق ستاتسيونار جۇمىس ىستەدى. ەپيدەميولوگيالىق جاعدايدىڭ تۇراقتالۋىنا بايلانىستى بۇل ەمدەۋ ورتالىقتارىنىڭ 13-ءى جابىلدى. مەديتسينالىق مەكەمەلەر قازىر قالىپتى جۇمىس رەجيمىنە كوشۋدە. ياعني، ناۋقاستار جوسپارلى تۇردە بۇرىنعىداي ەم قابىلداي الادى. قازىرگى تاڭعا مامانداندىرىلعان ينفەكتسيالىق ستاتسيونارلاردا بارلىعىندا 1 953 ورىن بار. توسەك ورىن تولىمدىعى 36 پايىزدى قۇرايدى،- دەدى ب.پوزيلوۆ.
شىمكەنت كوۆيدكە قارسى ۆاكتسيناتسيالاۋ بويىنشا 86, 8 % كورسەتكىشپەن 2-ورىندا تۇر. سوڭعى تاۋلىكتە قالادا 6839 ادام ۆاكتسينا الدى (I كومپونەنت-4721, II كومپونەنت-2118). ەگۋ ناۋقانى باستالعالى بارلىعى 472 655 ادام ۆاكتسيناتسيالاندى. ونىڭ ىشىندە 390 480 ادام ۆاكتسينانىڭ ەكى كومپونەنتىن قابىلدادى. دارىگەرلەرىمىزدىڭ تىنىمسىز ەڭبەگى مەن ۆاكتسيناتسيالاۋدىڭ ناتيجەسىندە ەپيدەميولوگيالىق جاعداي تۇراقتالىپ كەلەدى. شاھاردىڭ باس دارىگەرى ۆاكتسيناتسيالاۋدا ءالى دە حالىق اراسىندا الىپقاشپا اڭگىمەلەر بار ەكەنىن جاسىرمادى. ءوز كەزەگىندە باقىتجان جولداسبەكۇلى وقۋشىلارعا قاتىستى ۆاكتسينا تۋرالى قاۋەسەتكە سەنبەۋگە شاقىردى.
– كۇز كەلىپ، وقۋشىلار مەكتەپكە ورالدى. دەسە دە، اتا-انا كوڭىلى كۇپتى. ويتكەنى، ىرگەدەگى ىندەت كارىگە دە، جاسقا دا قاراپ جاتقان جوق. قازىرگى ۋاقىتتا مەكتەپتەردە كوۆيدكە قارسى ۆاكتسينا سالدىرىپ جاتىر دەپ شۋ شىعارعان ءبىر توپ اتا-اناعا ءتۇسىندىرۋ جۇمىستارىن جۇرگىزدىك. ەلىمىزدە 18 جاستان اسقان ادامدارعا ەكپە سالىنىپ جاتقانىن ايتا كەتەيىن. بالالار ۆاكتسيناسى تۋرالى ناقتى ءبىر شەشىم قابىلدانعان جوق. بىراق وقۋشىلار اراسىندا ىندەتتى جۇقتىرۋ دەرەگى بار. بۇل بالالار اۋىرمايدى دەگەن ءسوز ەمەس. جالپى، تۇرعىنداردان ارانداتۋعا ەرمەۋگە شاقىرامىن. جالعان اقپاراتتى تاراتقانى ءۇشىن قىلمىستىق جاۋاپكەرشىلىك قاراستىرىلعانىن ۇمىتپاعان ءجون، - دەيدى ول.
«ءبىرىنشى بايلىق – دەنساۋلىق» ەكەندىگىن بۇگىندە ادامزات بالاسى جاقسى تۇسىنەدى. ادامنىڭ التىنعا ايىرباستاماس قۇندىلىعى سانالاتىن ساۋلىقتىڭ قادىرىن اۋىرماي تۇرىپ بىلگەنگە نە جەتسىن؟ ىندەتكە قاتىستى قاۋىپ ءالى دە سەيىلگەن جوق، ارقانى كەڭگە سالۋعا بولمايدى. بۇل تۋرالى مەملەكەت باسشىسى كەزەكتى جولداۋىندا: «الداعى ۋاقىتتا الەمدە كوروناۆيرۋستىڭ جاڭا شتامدارى شىعۋى مۇمكىن. ساراپشىلار باسقا دا ىندەتتەر پايدا بولاتىنىن ايتۋدا. ءبىز ونىڭ قاشان بولاتىنىن كۇتىپ، قاراپ وتىرا المايمىز. وسىنداي جاعدايدا ءومىر ءسۇرىپ، ءارى قاراي دامۋعا بەيىمدەلۋىمىز كەرەك» دەگەن بولاتىن. بۇل رەتتە اۋىرىپ ەم ىزدەگەنشە، اۋىرماۋدىڭ جولىن ىزدەگەنىمىز دۇرىس بولار.
