شىمكەنت قالاسى اكىمىنىڭ ورىنباسارى ماقسۇت يساحوۆ ليتۆانىڭ الماتىداعى باس كونسۋلى كەرۋشاۋسكاس گۆيداسپەن كەزدەستى.
تاراپتار ەكى ەل اراسىنداعى ساۋدا-ەكونوميكالىق بايلانىس پەن ينۆەستيتسيالىق ىنتاماقتاستىقتى ارتتىرۋ ماسەلەسى مەن مادەني-گۋمانيتارلىق بايلانىستى نىعايتۋ جايىن تالقىلادى.
ماقسۇت پەرنەبايۇلى قالانىڭ دامۋ قارقىنىنا توقتالىپ، شىمكەنت - رەسپۋبليكانىڭ ەڭ ءىرى ونەركاسىپتىك جانە ساۋدا ورتالىقتارىنىڭ ءبىرى بولىپ تابىلاتىنىن ايتىپ ءوتتى.
«ءبىزدىڭ باستى ماقساتىمىز – قالانى ءومىر سۇرۋگە قولايلى ەتىپ، كاسىپ اشۋعا ىڭعايلى جاعداي جاساۋ. مۇنداي جەتىستىككە جەتۋ ءۇشىن، ءبىز ينۆەستيتسيالىق قوعامداستىقتارمەن بىرلەسە جۇمىس ىستەۋدى جالعاستىرا بەرمەكپىز. ەكىجاقتى بىرىككەن جۇمىستاردىڭ ناتيجەسىندە قازاقستان مەن ليتۆا اراسىندا بيزنەس جوبالار ءساتتى ىسكە اسارىنا سەنەمىن»، - دەدى اكىم ورىنباسارى.
كەزدەسۋ سوڭىندا ماقسۇت يساحوۆ ليتۆالىق كومپانيالاردى تۋريزم، ترانسپورت جانە لوگيستيكا، اقپاراتتىق تەحنولوگيالار جانە ماشينا قۇراستىرۋ سىندى سالالارعا ينۆەستيتسيا سالۋعا شاقىردى. بۇگىندە شىمكەنت قالاسىنىڭ ينۆەستورلارى ءۇشىن ۇزاق جىلعا جالعا الۋ ءۇشىن جەر تەگىن بەرىلەدى. سونداي-اق، دايىن ينفراقۇرىلىم مەن كوممۋنالدىق قىزمەتتەر ءۇشىن ەڭ تومەنگى تاريفتەر ۇسىنىلعان.
جالپى، ليتۆا رەسپۋبليكاسى قازاقستاننىڭ ەڭ ءىرى 10 ساۋدا سەرىكتەستەرىنىڭ قاتارىنا ەنگەن. ال، قازاقستان ليتۆانىڭ ەڭ ءىرى 15 ساۋدا سەرىكتەستەرىنىڭ تىزىمىندە. ايتا كەتەيىك، قازاقستان مەن ليتۆا اراسىنداعى ديپلوماتيالىق قارىم-قاتىناس ەڭ العاش 1992 جىلدىڭ 15 ماۋسىمىندا ورناعان.
شىمكەنت قالاسى اكىمدىگىنىڭ ءباسپاسوز قىزمەتى
