شىمكەنتتەگى №4 مەكتەپتىڭ وقۋشىلارى كوروناۆيرۋسقا قارسى ۆاكتسينا الدى. جاسى 12 جاستان اسقان جەتكىنشەكتەرگە امەريكالىق Pfizer كومپانياسىنىڭ پرەپاراتى سالىندى. وسى ماقساتتا وقۋ ورنىنداعى مەديتسينالىق پۋنكتى ارنايى دايىندالىپ، ۆاكتسينالاۋدى وقۋشىلارعا قالالىق №2 ەمحانانىڭ قىزمەتكەرلەرى جۇرگىزدى.
– العاشقى كۇنى 6 وقۋشى ەكپە الدى. بۇل مەكتەپكە العاش رەت كەلىپ وتىرمىز. الدىمەن اتا-انالارعا اقپاراتتار جىبەرىپ، سودان كەيىن وزدەرىمەن سويلەستىك. ۆاكتسينانىڭ ماڭىزىن تۇسىندىردىك. ودان كەيىنگى ماڭىزدى ماسەلە – بالالارعا پسيحولوگيالىق قولداۋ كورسەتۋ. ايتا كەتەيىك، وقۋشىلار قوبالجىعان جوق، اتا-انالارىنىڭ قولداۋى بىلىنەدى. ەكپە العان بالالارمەن بايلانىستا بولادى، 3 كۇن بويى ەمحانامىزدىڭ قىزمەتكەرلەرى حابارلاسىپ، جاعدايىن ءبىلىپ تۇرادى، – دەيدى №2 ەمحانانىڭ پسيحولوگى گۇلميرا ابىلداەۆا.
ەكپە العان بالالار مەديتسينالىق كابينەتتە 20 مينۋتتاي وتىرىپ، دارىگەرلەردىڭ باقىلاۋىندا بولدى. ولارعا ىستىق شاي مەن شوكولاد بەرىلدى. ايتا كەتەيىك، ەكپە العان بالالار ساباقتان ءۇش كۇنگە بوساتىلادى.
