شىمكەنتتە ەل تاۋەلسىزدىگىنىڭ 30-جىلدىعىنا ارنالعان «30 يگى ءىس» اكتسياسى جالعاسىن تابۋدا. اكتسيا اياسىنداعى كەزەكتى ءىس-شارا «بولاشاق» تىرەك-قيمىلى بۇزىلعان بالالاردى وڭالتۋ ورتالىعىندا ءوتتى. بۇل جولى «اۋىل» حالىقتىق-دەموكراتيالىق پاتريوتتىق پارتياسى ورتالىققا قايىرىمدىلىق كومەك كورسەتتى.
اتاپ ايتقاندا، «اۋىل» حدپپ شىمكەنت قالاسى بويىنشا فيليالىنىڭ توراعاسى، قالالىق ءماسليحات دەپۋتاتى قاناتبەك دوساليەۆ جانە پارتيا اتىنان سايلانعان ءماسليحات دەپۋتاتتارى قۋانىش داۋلەتاليەۆ پەن عاني قانجىگىتۇلى، سونداي-اق پارتيانىڭ نۇر-سۇلتان قالاسىنداعى ورتالىق اپپاراتىنىڭ قالا بويىنشا فيليال كوورديناتورى عالىمجان ورازباەۆ باستاعان «اۋىلدىقتار» وڭالتۋ مەكەمەسىنە «قۇرعاق باسسەين»، كەڭسە تاۋارلارىن جانە بالالاردىڭ وي-ءورىسىن دامىتۋعا، قيمىل-قوزعالىستى رەتتەۋگە ارنالعان ويىنشىقتار مەن ەمدىك قۇرالداردى سىيعا تارتتى. تاۋەلسىزدىك مەرەيتويى قارساڭىندا ۇيىمداستىرىلعان ءىس-شارا قايىرىمدىلىق ماقساتتى كوزدەپ، ورتالىق ۇجىمى مەن بالالاردىڭ ەسىندە قالار ءساتتى وقيعاعا اينالدى.
— ەلىمىزدىڭ ايتۋلى مەرەكەسى تاۋەلسىزدىك حالىققا شاتتىق كوڭىل كۇي سىيلاپ، ادەمى كورىنىستەرىمەن ەل جادىندا ساقتالىپ قالۋ ءۇشىن مەرەيتويعا ورايلاستىرىپ ساۋابى مول يگى امالداردى كوبىرەك جاساۋىمىز كەرەك. وسى ماقساتقا وراي بالالاردىڭ كۇلىمدەگەن كوزدەرى مەن بال-بۇل جانعان قۋانىشتى جۇزدەرىن كورۋ ءۇشىن «بولاشاق» وڭالتۋ ورتالىعىنا ارنايى ات باسىن بۇرىپ، بۇلدىرشىندەرگە دايىنداعان سىي-سياپاتىمىزدى تارتۋ ەتتىك. ۇلت ساۋلىعى ارقاشان مەملەكەتتىڭ باستى ستراتەگيالىق باعىتى بولىپ قالا بەرەدى. سوندىقتان قالاداعى تىرەك-قيمىل قوزعالىسى بۇزىلعان بىردەن ءبىر وسى مەكەمەگە ارنايى قايىرىمدىلىق ءىس-شاراسىن ۇيىمداستىردىق. «اۋىل» پارتياسى باستاعان مۇنداي يگى ىستەر كەيىن دە جالعاسىن تابادى، - دەدى شىمكەنت قالاسى بويىنشا ساياسي ۇيىم جەتەكشىسى قاناتبەك دوساليەۆ.
ايتا كەتۋ كەرەك، «بولاشاق» تىرەك-قيمىلى بۇزىلعان بالالاردى وڭالتۋ ورتالىعى، بۇل ۇكىمەتتىك ەمەس ۇيىم جانە «جيتس-تەن بالالاردى قورعاۋ» قايىرىمدىلىق قوعامدىق قورىنا قاراستى مەكەمە. ورتالىق باسشىسى جانەتتا جازىقباەۆانىڭ مالىمدەۋىنشە، وڭالتۋ مەكەمەسى ەكى باعىت بويىنشا قىزمەت اتقارادى. ونىڭ ءبىرىنشىسى، 2006 جىلى دارىگەرلەر قاتەلىگىنەن ايتۆ دەرتىنە شالدىققان 268 بالا مەن ولاردىڭ اتا-اناسىنا پسيحوالەۋمەتتىك، زاڭنامالىق كومەكتەر كورسەتۋ بولسا، ەكىنشىسى، مەملەكەتتىك تاپسىرىس بويىنشا پسيحونەۆرولوگيالىق جانە تىرەك-قيمىلىندا اۋىتقۋى بار بالالارعا مەديتسينالىق ەم-دوم شارالارىن جۇرگىزەدى. قور 2006 جىلى ايتۆ دەرتىن جۇقتىرعان سابيلەردىڭ اتا-انالارىنىڭ قولداۋىمەن اشىلعان.
ءانۋار جۇماشباەۆ
