شىمكەنت قالالىق №2 اۋرۋحاناسىنىڭ بازاسىندا يشەميالىق جانە گەمورراگيالىق ءينسۋلتتىڭ اۆتوماتتاندىرىلعان دياگنوستيكاسى ءۇشىن نەيروراديولوگيا سالاسىنداعى جاساندى ينتەللەكت جۇيەسى ىسكە قوسىلدى.
مي ينسۋلتىن 10 مينۋت ىشىندە انىقتايتىن «CEREBRA» جوباسىنىڭ تانىستىرىلىمى بارىسىندا جاڭا جۇيەمەن جۇمىس ىستەۋ ءادىسى مەن اۋرۋدىڭ ەرتە ساتىسىندا انىقتاۋدىڭ ماڭىزدىلىعى تولىعىمەن ءتۇسىندىرىلدى.
قازاقستاندىق تىڭ جوبا ارقىلى مەديتسينا ماماندارى ينسۋلتتى ەرتە دەڭگەيدە انىقتاپ، يشەمياعا ۇشىراعان ايماقتى ۋاقىتىندا ەمدەۋدى باستاۋعا، وپەراتسيا جاساۋعا قارسى كورسەتىلىمنىڭ بار-جوعىن انىقتاۋ مەن ەمدەۋ شارالارىن دەر كەزىندە جۇرگىزە الادى. سونىمەن قاتار اتالمىش اپپارات ينسۋلت يادروسىنداعى تىندەردىڭ تىعىزدىعىنىڭ وزگەرۋىن ەسەپتەپ وتىرۋعا مۇمكىندىك بەرەدى. كەلەشەكتە جاساندى ينتەللەكت جوباسىن نەۆرولوگيادا قولدانۋ جوسپارلانۋدا.
قازىرگى ۋاقىتتا «CEREBRA» جوباسىنا رەسپۋبليكا بويىنشا 6 قالا مەن 8 ينسۋلتتىق ورتالىق قوسىلعان. رەسمي مالىمەتتەر بويىنشا ەلىمىزدە جىل سايىن 40 مىڭنان استام ادام ينسۋلتقا ۇشىرايدى ەكەن. سالا ماماندارىنىڭ ايتۋىنشا بۇل اۋرۋ سوڭعى جىلدارى جاستار اراسىندا دا ءجيى كەزدەسىپ، جىلدان جىلعا جاسارىپ بارادى. سوندىقتان بۇل دەرتتىڭ الدىن الۋدا ەرتە دياگنوز قويىپ، ەمدەلۋدىڭ قولجەتىمدىلىگىن ارتتىرۋ باعىتىنداعى ءىس-شارالاردى كوپتەپ ۇيىمداستىرعان ابزال ەكەندىگىن اتاپ ءوتتى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
