شىمكەنت قالاسىندا «شاڭىراق» جەڭىلدەتىلگەن نەسيەلىك باعدارلاماسى بويىنشا تۇران شاعىن اۋدانىندا ورنالاسقان 280 پاتەرلى 5 ءۇي (№61ا،62ا،63ا،64ا،65ا ) قولدانىسقا بەرىلدى. شىمكەنت قالاسى قۇرىلىس باسقارماسىنىڭ باسشىسى ابىلسەيىت راباەۆ ازاماتتارعا پاتەر كىلتتەرىن تابىستادى.
شىمكەنت قالاسى قۇرىلىس باسقارماسىنىڭ باسشىسى ابىلسەيىت راباەۆ جاڭا قونىس يەلەرىنە ءتۇسىندىرۋ جۇمىستارىن جۇرگىزىپ، اتالعان تۇرعىن ۇيلەر بويىنشا ءتيىستى جۇمىستاردىڭ اتقارىلىپ جاتقاندىعىن جەتكىزدى.
–تۇران شاعىناۋدانىندا 280 پاتەرلى 5 ءۇيدى پايدالانۋعا بەرىپ جاتىرمىز. بۇل ۇيلەردىڭ سمەتالىق قۇنى 4,5 ملرد. تەڭگەنى قۇرايدى. قازىر بانكپەن ءوزارا قۇجات راسىمدەۋ جۇمىستارىن تولىق اياقتاعان ازاماتتار قونىستانۋ مۇمكىندىگىن الدى. تۇرعىن ۇيلەردىڭ 5 جىلدىق مەرزىمدە كەپىلدەمەسى بار. قازىردە مەردىگەر مەكەمەلەرمەن ينفراسترۋكتۋرا قۇرىلىمدارىن ىسكە قوسۋ جۇمىستارى بويىنشا ءتيىستى جۇمىستار اتقارىلۋدا،- دەدى ءا. راباەۆ
بۇعان دەيىن اتالعان باعدارلاما اياسىندا شىمكەنت قالاسىندا، تۇران شاعىن اۋدانىندا ورنالاسقان 12 تۇرعىن ءۇيدىڭ ياعني (№49ا،50ا،52ا،53ا،54ا، 6ا،8ا ، 10ا ،12ا، 14ا، 16ا، 18ا) ينفراقۇرىلىمدىق كوممۋنالدىق قىزمەتتەرى جۇرگىزىلىپ، ازاماتتاردى قونىستاندىرۋ جۇمىستارى جالعاسۋدا.
«شاڭىراق» جەڭىلدەتىلگەن نەسيەلىك باعدارلاماسى ارقىلى دانيار ءاشىرباي بۇگىندە ارمانداعان پاتەرىنە قول جەتكىزىپ وتىر. ول 2015 جىلى كەزەككە تىركەلگەن. بايسالدىلىقپەن كۇتىپ، ءۇش بولمەلى باسپاناعا قول جەتكىزدى.
– جىلدار بويى باسپانا جالداپ كەلدىك. بىراق مويىمادىق، تاباندىلىق تانىتتىق. كوپ ۇزاماي ءوزىمىزدىڭ ءۇيىمىز بولارىنا سەندىك. ءبىزدىڭ باسپانالى بولۋىمىزعا جاعداي جاساعان اكىمدىك قىزمەتكەرلەرى مەن «وتباسى بانككە» العىسىمىزدى بىلدىرەمىز.
جەرگىلىكتى اكىمدىك تاراپىنان ازاماتتاردىڭ باسپانالى بولۋىنا قولداۋ رەتىندە 500 ازاماتقا 1 ملن. تەڭگەگە دەيىن نەسيەلىك باسپانانىڭ العاشقى جارناسى قارالعان. اتالعان سەرتيفيكاتقا 1000-نان اسا ءوتىنىم قابىلدانسا، ونىڭ ىشىندە 382 ءوتىنىم ماقۇلداندى. قازىر 382 ءوتىنىمنىڭ 239-ى «شاڭىراق» باعدارلاماسىنىڭ قاتىسۋشىلارى بولىپ تابىلادى.
«شاڭىراق» باعدارلاماسىنا تۇرعىن ءۇي كەزەگىندەگى ازاماتتار عانا قاتىسا الادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
