ەل پرەزيدەنتى قاسىم-جومارت توقاەۆ «قازاقستان جاڭا شىندىقتا: ءىس-قيمىل ۋاقىتى» اتتى قازاقستان حالقىنا جولداۋىندا بۇقارالىق سپورتتى دامىتۋدىڭ ماڭىزدىلىعىن اتاپ وتكەن بولاتىن. بۇل باعىتتا شىمكەنت قالاسىندا جۇيەلى جۇمىستار قولعا الىنىپ، 2021 جىلدىڭ العاشقى جارتىجىلدىعىنىڭ قورىتىندىسى بويىنشا دەنە شىنىقتىرۋمەن جانە بۇقارالىق سپورتپەن قامتىلعان ازاماتتار سانى 340 مىڭنان استى. بۇل قالا تۇرعىندارىنىڭ جالپى سانىنىڭ 31,2 پايىزىن قۇرايدى.
تۇرعىنداردىڭ سپورتپەن شۇعىلدانۋىنا مۇمكىندىك جاساۋ ماقساتىندا قالا ورتالىعىنان شالعايدا جاتقان شاعىن اۋداندار مەن تۇرعىن الاپتاردا 115 امبەباپ سپورت الاڭشالارى اشىلدى. كوپ قاباتتى تۇرعىن ۇيلەر بويىنشا 101 اۋلا جاڭارتىلىپ، دەنە شىنىقتىرۋ، سپورتتىق ويىندار وتكىزەتىن ورىندار رەتىندە جاساقتالدى.
بۇقارالىق سپورتتى دامىتۋدىڭ ءبىر باعىتى مەكتەپ جانە وقۋشىلار ليگاسىن وتكىزۋ ارقىلى داميتىن مەكتەپ جانە ستۋدەنتتەر سپورتى. بۇقارالىق سپورتتىڭ بۇل باعىتى جاس ۇرپاقتىڭ دەنساۋلىعىن قامتاماسىز ەتىپ قانا قويماي، سۋيتسيدتىك قۇبىلىستار، ناشاقورلىق جانە جاسوسپىرىمدەر اراسىنداعى قۇقىق بۇزۋشىلىق سياقتى كوپتەگەن الەۋمەتتىك ماسەلەلەردى شەشەدى.
وسى ماقساتتا قالادا «جاستار ليگاسى» سپورت ويىندارى وتكىزىلىپ، وعان ءار شاعىن اۋدان مەن تۇرعىن الاپتار جاستارى ساناتىنان 536 كوماندا قاتىسىپ، سپورتتىڭ ءتورت تۇرىنەن سايىستار وتكىزىلدى.
جالپى، بيىلدىڭ وزىندە سپورت ۇيىرمەلەرىنە قوسىمشا 4 مىڭنان استام بالانى قامتىپ، قالادا سپورتتىق قوزعالىستاردىڭ دامۋىنا مۇمكىندىكتەر قاراستىرىلعان.
"ادىرنا" ۇلتتىق پورتالى.
