قۇرمەتتى، الماتى وبلىسىنىڭ سۋ جاڭا اكىمى قانات الدابەرگەنۇلى!
ۇيعىر اۋدانىنىڭ اتىن وزگەرتۋ جايلى كەشە جازعان جازبامىزدى وقىعانىڭىزدى بىلدىك. ۇيعىر اقىنى باحتيانىڭ ابىرويىن اسىرىپ، التى الاشتىڭ اقيىق اقىنى مۇقاعاليدى "كىشىرەيتەتىن" پيعىلدىڭ استارىندا نە بار ەكەنىن (قابىلدانباعان ەسكيز بولسا دا) وقىرمان دا، ءسىز دە جاقسى ءتۇسىندى دەپ ويلايمىن!
ەندى مىنا ماسەلەگە نازار اۋدارساڭىز! مەملەكەتتىڭ تۋى ءىلىنۋى كەرەك تۋتۇعىر 2019 جىلدان بەرى بوس تۇر.
بيىكتىگى 30 مەتر بولاتىن بۇل تۋتۇعىردى جاساۋ ءۇشىن مەملەكەت قالتاسىنان 6,5 ملن تەڭگە بولىنگەن. ونىڭ اشىلۋ سالتاناتى 2019 جىلدىڭ 4- ماۋسىمىندا وتەتىن بولىپ جوسپارلانعان. سونىڭ ءبىرى دە بولمادى.
ۇيعىر اۋدانى باسشىلارىنىڭ 2,5 جىلدان بەرى تۋتۇعىردى تۋسىز بوس قويىپ قويۋى مەملەكەتتىك رامىزگە دەگەن پروتەستىك كوڭىل-كۇيدى بىلدىرمەي مە؟ جوق الدە ولار بۇل تۇعىرعا شىعىس تۇركىستاننىڭ جالاۋىن جەلبىرەتەتىن كۇندى كۇتىپ وتىر ما؟
قازاق بەسىكتىڭ بەتىن اشىق قالدىرمايتىن ىرىمشىل ۇلت. تۋتۇعىردى تۋ ءىلۋ ءۇشىن تۇرعىزىپ، ونى وسىنشاما ۋاقىت بوس قويىپ قويۋ جاماندىق تىلەۋدىڭ كورىنىسى ەمەس پە؟ ىرىمشىل قازاق بۇعان نە دەيدى؟ ءسىزدى دە بىلەتىندەر ىرىمشىل ادام ەكەنىڭىزدى ايتۋدا. تۋتۇعىردىڭ بوس تۇرۋى ءسىزدىڭ دە جۇرەگىڭىزدى تىتىركەندىرمەي مە؟
مىنە، وسىنداي ءۇنسىز قارسىلىقتى بولدىرماۋدىڭ توتە جولى - اۋداننىڭ تاريحي قارادالا اتاۋىن قايتارۋ. بۇل ماسەلەنى قر پرەزيدەنتى قاسىم-جومارت كەمەلۇلى توقاەۆقا جەتكىزەرسىز دەپ ويلايمىن (بەرىك ءۋالي).
پى/سى
سوڭعى ءبىر اي كولەمىندە تۋتۇعىردىڭ اينالاسىندا اباتتاندىرۋ جۇمىستارى جۇرە باستادى. ول ءۇشىن مەملەكەت قالتاسىنان 11 ملن تەڭگە بەرىلىپتى. سوسىن، تۋتۇعىردىڭ استىنا 27 ملن تەڭگەگە قازاقستاننىڭ كارتاسى قويىلماق ەكەن. ارينە، بۇل شارۋالاردى جاساۋعا، ءالى دە جاساي بەرۋگە وتىز مەتر بيىكتىكتەگى مەملەكەتتىك تۋ كەدەرگى كەلتىرمەس ەدى.
قۇرمەتتى، قانات الدابەرگەنۇلى!
قازاقستاننىڭ جالاۋىن بيىكتە جەلبىرەتۋگە دەگەن قۇلىقسىزدىقتىڭ بولماۋى ءۇشىن دە سىزدەن باتىل قادام كۇتەمىز!
قانات ابىلقايىردىڭ Facebook-تەگى جازباسىنان
”ادىرنا” ۇلتتىق پورتالى
