سەنات دەپۋتاتى نۇريا نيازوۆا قازاقستاندا پەداگوگيكالىق ماماندىق تۇلەكتەرى ءۇشىن "قايتا وقىتۋ" جۇيەسىن ەنگىزۋدى ۇسىندى، دەپ حابارلايدى "ادىرنا" ۇلتتىق پورتالى.
دەپۋتات ەلدەگى مۇعالىم تاپشىلىعى مەن ولاردىڭ ساپالىق قۇرامى ماسەلەسىن كوتەرىپ، پەداگوگتەردىڭ بىلىكتىلىگىن ارتتىرۋدا مەملەكەتتىك باقىلاۋدى كۇشەيتۋ قاجەتتىگىن اتاپ ءوتتى.
نيازوۆا "ورلەۋ" ۇلتتىق ورتالىعىنا ۇيلەستىرۋ فۋنكتسياسىن بەكىتۋ، وقۋ ورىندارىن مىندەتتى ليتسەنزيالاۋدى ەنگىزۋ، مۇعالىمدەردى دايارلاۋدىڭ قاتاڭ ساپا ستاندارتتارىن قالىپتاستىرۋ شارالارىن ەنگىزۋدى ۇسىندى.
"پەداگوگيكالىق كادرلاردى دايارلاۋ ساپاسىن ارتتىرۋعا باعىتتالعان شارالاردى قولعا الۋ قاجەت. 2024 جىلى پەداگوگيكالىق ماماندىقتاردىڭ تۇلەكتەرىنىڭ تەك 45,6%-ى عانا 50 پايىزدىق شەكتى دەڭگەيدەن ءوتتى. "قايتا وقىتۋ" جۇيەسى جوعارى وقۋ ورىندارىندا جەتكىلىكسىز ءبىلىم العان تۇلەكتەردىڭ كاسىبي دەڭگەيىن ارتتىرۋعا ىقپال ەتە الادى", – دەدى نيازوۆا.
سونداي-اق سەناتور پەداگوگيكالىق ماماندىقتار بويىنشا تۇلەكتەردى دايارلاۋ ستاندارتتارىن كوتەرۋ، جوو-لاردىڭ جاۋاپكەرشىلىگىن ارتتىرۋ جانە جاڭا مونيتورينگ جۇيەسىن ەنگىزۋ قاجەتتىگىن اتاپ ءوتتى. ونىڭ ايتۋىنشا، بۇل شارالار ءبىلىم بەرۋ جۇيەسىنىڭ تۇراقتى دامۋىن قامتاماسىز ەتىپ، مۇعالىمدەردىڭ كاسىبي مارتەبەسىن نىعايتۋعا كومەكتەسەدى.
