قوعام مەن عىلىمنىڭ دامۋىنا ءوز ۇلەسىن قوسقان ايەلدەر جايلى «عىلىمداعى ايەلدەر. الەمدى وزگەركەن 50 عالىم-ايەل» كىتابى قازاق تىلىندە جارىق كوردى. الەمدىك بەستسەللەرلەردى «مازمۇنداما» قوعامدىق قورى «YPO Kazakhstan» ءتورايىمى گاۋحار قاپپاروۆانىڭ دەمەۋىمەن باسىپ شىعاردى.
بەلگىلى ديزاينەر رەيچەل يگناتوۆسكيدىڭ كوركەم يلليۋستراتسيالانعان كىتابىنىڭ كەيىپكەرلەرى – ماتەماتيكا، كوسموناۆتيكا، مەديتسينا، حيميا، فيزيكا جانە ت.ب. عىلىم سالالارىندا ادامزاتتىڭ ورتاق مۇراسىنا اينالعان جاڭالىقتار اشقان، عىلىم جولىندا ءومىرىن، دەنساۋلىعىن قۇربان ەتكەن، كەدەرگىلەرمەن كۇرەسكەن عالىم-ايەلدەر. ولاردىڭ ەڭبەكتەرى بولاشاق ينجەنەر، بيولوگ، گەنەتيك، ماتەماتيك، دارىگەر، استرونوم، فيزيكتەرگە شابىت سىيلايدى.
«عىلىمداعى ايەلدەر. الەمدى وزگەركەن 50 عالىم-ايەل» كىتابىنىڭ قازاقشا نۇسقاسىن گاۋحار سارسەكەنقىزى ءال-فارابي اتىنداعى قازاق ۇلتتىق ۋنيۆەرسيتەتىندە 40 جىلدان استام قاجىرلى ەڭبەك ەتكەن اناسىنا ارنايدى.
سونىمەن قاتار قاپپاروۆانىڭ دەمەۋىمەن «اليسا عاجايىپتار الەمىندە» ەرتەگىسى دە قازاق تىلىندە باسىلىپ وتىر. كاسىپكەر بالالارعا ارنالعان وسىنداي كىتاپتار جاس ۇرپاقتىڭ الەمگە تانىمال تەڭدەسىز تۋىندىلارىن ءتول تىلىمىزدە وقىپ، وزدەرىن وسى كىتاپتاردىڭ كەيىپكەرلەرىنىڭ ورىنىنا قويىپ، شابىتتانىپ، ۇشقىر قيالىن دامىتىپ قانا قويماي، وقۋ-ءبىلىم ىزدەپ، ارمان قۋىپ، بيىك شىڭداردى باعىندىرۋعا دەگەن ۇمتىلىسىن ارتتىرادى دەپ ەسەپتەيدى.
