ەلوردادا پوليتسيا قىزمەتكەرلەرى مەملەكەتارالىق ىزدەۋدە جۇرگەن قىلمىسكەردى ۇستادى، دەپ حابارلايدى "ادىرنا" ۇلتتىق پورتالى «نۇر سۇلتان» پوليتسيا ءبولىمىنىڭ باسپاسوز قىزمەتىنە سىلتەمە جاساپ.
ەر ادام 2014 جىلى وزبەكستاننان التى ازاماتتى قازاقستاندا جالاقىسى جوعارى جۇمىسقا ورنالاستىرامىن دەپ، الىپ كەتكەن. بىراق الماتىعا كەلگەن سوڭ ولاردىڭ تولقۇجاتتارىن الىپ، باسقا ادامعا تاپسىرعان. جەتى اي بويى ەر ادامدار اۋىر جاعدايدا جۇمىس ىستەۋگە ءماجبۇر بولعان.
2015 جىلى وزبەكستان رەسپۋبليكاسىندا ادام ساۋداسىمەن اينالىسقان ەر ادام 5 جىلعا باس بوستاندىعىنان ايىرىلعان. 2019 جىلى سوت ۇكىمدى شارتتى تۇردە مەرزىمىنەن بۇرىن بوساتۋعا وزگەرتتى. ەر ادام بوستاندىققا شىققان بويدا بىردەن قازاقستانعا قاشىپ، وزبەكستاندا ىزدەۋ جاريالانعان.
قازىر سوت شەشىمىمەن ەر ادام قاماۋعا الىنىپ، وزبەكستانعا ەكستراديتسيالاۋ ماسەلەسى شەشىلۋدە.
"ادىرنا" ۇلتتىق پورتالى
