پەريناتالدى ورتالىقتىڭ باس دارىگەرى قۋانىش نىسانباەۆ، اكۋشەر-گينەكولوگ اسقار قايىرجان جانە اكۋشەر ءجاميلا قۇلباتىروۆا تەرگەۋ اباقتىسىنان كولونياعا اۋىستىرىلدى.
قۋانىش نىسانباەۆ پەن اسقار قايىرجان ورال قالاسىنداعى قاتاڭ رەجيمدەگى كولونياعا اۋىستىرىلدى. اتىشۋلى ءىس بويىنشا تاعى ءبىر ايىپتالۋشى ءجاميلا قۇلباتىروۆا جازاسىن الماگۇل ىقشام اۋدانداعى ايەلدەر كولونياسىندا وتەيتىن بولدى. نەوناتولوگ دارىگەرلەر رۋسلان نۇرمۇحامبەتوۆ پەن داريعا جۇماباەۆا پروباتسيا قىزمەتىنىڭ باقىلاۋىنا الىندى، دەپ حابارلادى "اقجايىق".
اسقار قايىرجان باسىلىم رەداكتسياسىنا سۇحبات بەرۋ تۋرالى ۇسىنىسپەن حات جولدادى. الايدا قىلمىستىق اتقارۋ جۇيەسى دەپارتامەنتى مەن وبلىستىق سوت ءتىلشىنى تەرگەۋ يزولياتورىنا كىرگىزۋدەن باس تارتتى.
ەسكە سالساق، پەريناتالدى ورتالىقتىڭ باس دارىگەرى قۋانىش نىسانباەۆ، اكۋشەر-گينەكولوگ اسقار قايىرجان جانە اكۋشەر ءجاميلا قۇلباتىروۆا الدىن الا ءسوز بايلاسۋ ارقىلى جاڭا تۋعان نارەستەنى ولىمىنە كىنالى دەپ تانىلىپ، تيىسىنشە 18, 16 جانە 15 جىلعا باس بوستاندىعىنان ايىرىلعان بولاتىن. ال دارىگەر-نەوناتولوگتار رۋسلان نۇرمۇحامبەتوۆ پەن داريعا جۇماباەۆا قىلمىس تۋرالى حابارلاماعانى ءۇشىن ءۇش جىلعا باس بوستاندىعىن شەكتەۋ جازاسىن الدى.
جاڭا تۋعان نارەستەنىڭ ءولىمى
2019 جىلدىڭ 29 قىركۇيەگىندە اتىراۋ پەريناتالدىق ورتالىعىندا دۇنيەگە كەلگەن نارەستە قيمىلسىز جاتقاننان كەيىن دارىگەرلەر ونى ءولى تۋدى دەپ تىركەگەن. الايدا ستوڭازىتقىش كامەراعا اپارعان كەزدە اياعى قيمىلداي باستاعان.
سىبايلاس جەمقورلىققا قارسى قىزمەتتىڭ حابارلاۋىنشا، دارىگەرلەر قۇجاتتى تۇزەتپەۋ ءۇشىن ونى توڭازىتقىشتا قالدىرۋعا شەشىم قابىلداعان. سوتتا تەرگەۋشى اسقاربەك ەرمۇقاشەۆ دارىگەرلەردىڭ تەلەفون ارقىلى سويلەسكەن ستەنوگرامماسى بار ەكەنىن ايتقان.
فيلولوگيالىق ساراپتامانىڭ قورىتىندىسى دا جاسالدى. سوندا دارىگەرلەردىڭ ءبىر-بىرىمەن كەڭەسىپ، بالانىڭ تاعدىرىن شەشكەنى انىق بايقالادى. اڭگىمەنىڭ ستەنوگرامماسىندا "قۇداي ءبىزدى كەشىرسىن" دەگەن سوزدەر بار.
دارىگەرلەرگە سوت ۇكىمى شىقتى
2020 جىلدىڭ 18 قاڭتارىندا اتىراۋدا جاڭا تۋعان بالانى الدىن الا ءسوز بايلاسۋ ارقىلى ءولتىردى دەپ ايىپتالعان وبلىستىق پەريناتالدىق ورتالىقتىڭ دارىگەرلەرىنە سوت ۇكىمى شىقتى.
سوت ولاردى كىنالى دەپ تانىپ، پەريناتالدىق ورتالىقتىڭ بۇرىنعى باس دارىگەرى قۋانىش نىسانباەۆتى 18 جىلعا، اكۋشەر-گينەكولوگ اسقار قايىرجاندى 16 جىلعا، اكۋشەر ءجاميلا قۇلباتىروۆانى 15 جىلعا باس بوستاندىعىنان ايىردى.
نەوناتولوگ-دارىگەرلەر رۋسلان نۇرمۇحامبەتوۆ پەن داريعا جۇماباەۆا قىلمىس تۋرالى حابارلاماعانى ءۇشىن كىنالى دەپ تانىلىپ، ءۇش جىلعا باس بوستاندىعى شەكتەلدى.
“ادىرنا” ۇلتتىق پورتالى
